Թուրքական Anadolu գործակալության փոխանցմամբ, Թուրքիայի վարչապետ Ռեջեփ Էրդողանն այսօր հեռախոսազրույց է ունեցել ԱՄՆ նախագահ Բարաք Օբամայի հետ և քննարկել արաբական աշխարհի վերջին զարգացումները:
Լիբիայի հետ կապված` Էրդողանը նշել է, որ այնտեղ պետք է վերջ տրվեն քաղաքացիական անձանց դեմ իրականացվող հարձակումներին, Քադաֆին պետք է հեռանա, և անհրաժեշտ է գտնել այնպիսի որոշում, որը կարտացոլի լիբիական ժողովրդի կամքը:
Օբաման իր հերթին արժևորել է Թուրքիայի ներդրած ջանքերը և ՆԱՏՕ-ի գործողություններին մասնակցություն ցուցաբերելը:
Սիրիայի հետ կապված` Օբաման ու Էրդողանը մեծ անհանգստություն են հայտնել, որ սիրիական կառավարությունը զենք է կիրառում սեփական քաղաքացիների նկատմամբ, և նրան կոչ են արել վերջ դնել այդ ամենին ու անհապաղ ժողովրդավարական բարեփոխումներ իրականացնել:
Օբաման նաև հույս է հայտնել, որ Թուրքիան և Իսրայելը կկարողանան լեզու գտնել իրար հետ, ինչը բխում է տարածաշրջանային կայունության բարելավման շահերից:
Հիշեցնենք, որ երբ ապրիլի սկզբին Սիրիայի քրդերը սպառնացին ապստամբություն բարձրացնել, Էրդողանն անմիջապես Սիրիայի նախագահ Բաշար Աասադին խորհուրդ տվեց ոչ մի գնով հրաժարական չտալ և բարեփոխումներ իրականացնել.
«Սիրիական զարգացումներն անմիջականորեն իրենց ազդեցությունն են ունենում հարևան Թուրքիայի վրա: Թուրքիայի համար մեծ վտանգ են ներկայացնում Սիրիայում բնակվող 1.4 միլիոն քրդերը:
Եթե նախագահ Բաշար Ասադը հրաժարական տա, ապա այդ 1.4 միլիոն սիրիական քրդերը, Թուրքիայում բնակվող 15 միլիոն, Իրանում բնակվող 7 միլիոն և Հյուսիսային Իրաքում բնակվող 6 միլիոն քրդերի հետ միասին, ոտքի կկանգնեն և միացյալ անկախ պետության պահանջ կդնեն»:
