Վենեսուելայի նախագահի լիազորությունները ժամանակավոր ստանձնած Նիկոլաս Մադուրոն հնագույն անեծքով է սպառնացել այն ընտրողներին, ովքեր չեն քվեարկի իր օգտին ապրիլի 14-ին կայանալիք արտահերթ նախագահական ընտրություններում: Այս մասին հայտնում է ITAR-TASS-ը:
Նա իր հիմնական մրցակցին՝ ընդդիմադիր Էնրիկե Կապրիլեսին, համեմատել է իսպանացի նվաճողների հետ, որոնք XV-XVI դարերում զավթել են Կենտրոնական և Լատինական Ամերիկայի տարածքները: Ելույթ ունենալով Բրազիլիային սահմանակից Ամասոնաս նահանգում անցկացված հանրահավաքում՝ նա հայտարարել է, որ Կապրիլեսի օգտին քվեարկողների վրա կթափվի Մարակապանայի անեծքը: Նա նկատի է ունեցել XVI դարում Մարակապանա վայրում իսպանացիների մարտը: Այդ ժամանակ բազմաթիվ հնդկացիներ էին զոհվել:
«Եթե հաղթի բուրժուազիան, ապա նրանք կսկսեն մասնավորեցնել կրթության և առողջապահության ոլորտը, հնդկացիներից կվերցնեն հողերը: Այդ ժամանակ անեծքը կթափվի Կապրիլեսի օգտին քվեարկողների վրա»,- ասել է Մադուրոն:
Ընդդիմադիր ուժերի առաջնորդն էլ իր հերթին նշել է, որ իսկական անեծք կլինի Մադուրոյի հաղթանակը: Կապրիլեսը, ելույթ ունենալով Տաչիրա նահանգում, հայտարարել է, որ մարդկանց անեծքներով սպառնացողը երկիրը ղեկավարելու իրավունք չունի:
Վենեսուելայում երեքշաբթի մեկնարկել է նախընտրական քարոզարշավը, որը կտևի մինչև ապրիլի 11-ը: Մարտի 5-ին Ուգո Չավեսի մահից հետո երկրում նշանակվել են արտահերթ նախագահական ընտրություններ, որոնք կանցկացվեն ապրիլի 14-ին:
