Ճապոնական Օկինավա պրեֆեկտուրայի նահանգապետը պաշտոնապես չեղարկել է Նագո քաղաքի մոտ ԱՄՆ ռազմաօդային ուժերի համար նոր օդակայանի շինարարության թույլտվությունը։ Kyodo գործակալության փոխանցմամբ՝ նահանգապետ Տակեսի Օնագան իր որոշման մասին ծանուցում է ուղարկել Ճապոնիայի ՊՆ-ի Օկինավայի բաժանմունք։
Մոտ 20 տարի առաջ Ճապոնիայի կառավարությունը որոշում էր ընդունել փակել Օկինավա կղզու կենտրոնի Գինովան քաղաքում ամերիկյան ռազմաբազան։ Սկզբում նախատեսվում էր բազան դուրս բերել պրեֆեկտուրայի սահմաններից, սակայն այնուհետև որոշում ընդունվեց բազայի օդակայանը վերատեղակայել կղզու ներսում և դրա համար նոր շինարարություն սկսել Հենոկոյում, որտեղ արդեն գտնվում է ամերիկյան «Քեմբ Շվաբ» ամերիկյան բազան։
Օկինավայի բնակչությունը դեմ է դրան, և նահանգապետը իր նախընտրական արշավում բազմիցս խոստացել էր հասնել նոր օդակայանի շինարարության ծրագրերի չեղարկման։ Օկինավան կազմում է ճապոնական տարածքի ընդամենը 0.6 տոկոսը, սակայն այնտեղ է տեղակայված ամերիկյան ռազմական օբյեկտների 74 տոկոսը և Ճապոնիայում ԱՄՆ ԶՈւ կեսից ավելին։
Պրեֆեկտուրայի վարչակազմի տվյալներով՝ Օկինավայում են գտնվում 25.8 հազար ամերիկացի զինծառայողներ և նրանց ընտանիքի 19 հազար անդամներ ու ԱՄՆ քաղաքացիական անձինք:
