Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ ավարտվել է Նաիրի Մարությանի գործի դատական քննությունը:
34-ամյա Նաիրին բարձրագույն կրթություն ունի, ամուսնացած է, նրա խնամքին են 3 անձ, այդ թվում՝ 13 և 3 տարեկան երեխաները:
Նրան մեղադրանք էր առաջադրվել մեկ այլ անձի հետ նախնական համաձայնությամբ ավազակային հարձակում կատարելու համար:
Դատարանը հաստատված է գնահատել, որ 2014 թվականի հոկտեմբերի 31-ին, ժամը 17-ի սահմաններում Նաիրին ու նրա հանցընկերը գնացել են Երևանի Ամիրյան փողոցի շենքերից մեկը, բարձրացել են 9-րդ հարկ ու սպասել են իրենց հարձակման թիրախ ընտրված տան տիրուհուն:
Կինը վերադարձել է աշխատանքից, վերելակով բարձրացել, հասել է իր բնակարանին, գնումներով տոպրակները դրել է բնակարանի մուտքի դռան առաջ, պայուսակից հանել է բանալիները, անջատել է բնակարանի անվտանգության ապահովման համակարգը, բացել է դռան փականները, տոպրակները բռնած՝ հրել ու բացել է դուռը:
Բայց դեռ ներս չմտած՝ հետևից մի ձեռք փաթաթվել է նրան, մի ձեռք էլ փակել է նրա բերանը: Կինը շրջվել ու նկատել է սև դիմակով մեկին:
Նաիրի Մարությանն ու ընկերը չեն թողել, որ կինն ուշքի գա, նրան հրելով՝ անմիջապես մուտք են գործել բնակարան:
Նրանք իրենց հետ տարած կպչուն ժապավենով կապել են տանտիրուհու բերանը, ոտքերը, ձեռքերը, հարվածներ են հասցրել՝ նրա առողջությանը պատճառելով միջին ծանրության վնաս՝ գանգուղեղային փակ վնասվածք, գլխուղեղի ցնցում, արյունազեղումներ, քերծվածքներ:
Ըստ նախաքննական մարմնի՝ Նաիրին ու նրա հանցընկերը տուժողի բնակարանից հափշտակել են ընդհանուր՝ 2 միլիոն 350 հազար դրամի զարդեր՝ զմրուխտե, ադամանդե քարերով ոսկե մատանիներ, ոսկե կախազարդով շղթա և այլն:
Ամբաստանյալ Նաիրի Մարությանը մենակ էր նստած ամբաստանյալի աթոռին: Նա իրեն դատարանում մեղավոր ճանաչեց մասնակիորեն, հայտնեց, որ զղջում է կատարածի համար, ներողություն խնդրեց տուժող կնոջից:
Նաիրին հայտնեց, թե ցանկացել է մեկնել Սոչի, իր մոտ եղել է 700 դոլար, որ իրեն տատիկն էր նվիրել:
Ինքը հանցընկերոջը ճանաչել է դպրոցական ժամանակից: Նա էլ էր ցանկանում երկրից դուրս գնալ:
Նաիրին ասաց, որ ինքը տուժող կնոջը չի ճանաչել: Ընկերն իմացել է, որ այդ կնոջը 1500 դոլար են ուղարկում: Իրենց նպատակը եղել է մտնել տուժողի տուն, վերցնել այդ գումարը ու հեռանալ: Իրենք իրենց հետ տարել են միայն կպչուն ժապավեն:
Սկզբում տուն մտել է ընկերը: Նա մեկ անգամ հարվածել է տանտիրուհուն, ասել է, որ նա ձայն չհանի, քանի որ նրան վնաս չեն տալու: Տուժողը մտել է սեղանի տակ: Իրենք կպչուն ժապավենով կապել են կնոջ ոտքերը:
Իրենք տուժող կնոջը չեն ծեծել: Մասնավորապես՝ ինքը նրան ընդհանրապես չի հարվածել:
Կնոջ պայուսակի մեջ գումար է եղել, անգամ գետնին ընկած է մնացել մատանի, բայց իրենց նպատակն է եղել կոնկերտ 1500 դոլարը վերցնելը: Իրենք միայն այդ գումարն են փնտրել:
Այդ բնակարանից ոչ մի զարդ չեն տարել, իրենց հետևից բնակարանի դուռը չեն փակել:
Ինքը զարմացել է՝ տեսնելով, որ տուժողը, ընկած ժամանակ, գլուխը հարվածել է գետնին:
Տուժող կինը դատարան չի ներկայացել: Դատարանում հրապարակվել են նրա նախաքննական ցուցմունքները:
Կինը հայտնել է, որ ամուսնացած չի եղել, երեխաներ չունի: Աշխատում է երևանյան պոլիկլինիկաներից մեկում՝ որպես փոխտնօրեն:
Աշխատանքն ավարտում է ժամը 17-ին:
Դեպքի օրը աշխատանքից հետո վերադարձել է տուն:
Դուռը բացել է, բայց դեռ ներս չմտած՝ իր թիկունքից ձեռքով մարմինը գրկել են, մի ձեռքով էլ փակել են իր բերանը: Ինքը գլուխը աջ է շրջել, տեսել է սև դիմակով մի անձնավորության:
Իրեն ներս են հրել, ապա միջանցքից հրելով տարել են խոհանոց: Հրել են խոհանոցի սեղանի տակ:
Ինքը մեջքի վրա է ընկել և օգնություն է կանչել:
Այդ ժամանակ նկատել է, որ դիմակով անձնավորությունը սև գուլպայով է իրեն քողարկել: Երբ ինքն օգնություն է կանչել, նա ասել է՝ սո՛ւս մնա, ձենդ կտրի: Միաժամանակ փորձել է կպչուն ժապավենով ոտքերը կապել:
Ինքը ոտքերն ինտենսիվ շարժել է, որ թույլ չտա կապել: Դիմակովը կռացել ու բռունցքով մի քանի անգամ հարվածել է իր դեմքին:
Հետո մոտեցել է ևս մի դիմակով անձնավորություն: Երկուսով կապել են իր ոտքերը:
Ամբողջ ընթացքում ինքը օգնություն է կանչել:
Նրանց հարվածներից ինքը շշմել է, նրանք նույն ժապավենով կապել են նաև իր բերանը:
Ինքը փորձել է պաշտպանվել, նրանք հարվածել են իր դեմքին, որովայնին, կրծքավանդակին: Ինքը ձեռքով պատռել է նրանցից մեկի դիմակը և իր կարծիքով՝ ճանկռել է նրա դեմքը: Նրանք շարունակել են իրեն հարվածել:
Իր գիտակցությունը կարծես մթագնել է: Գիտակցությունը վերականգնվել է այն ժամանակ, երբ ինքը նստած է եղել իր տան հյուրասենյակի բազմոցին, տանը արդեն շատ ոստիկաններ կային, շտապօգնության բժիշկներ:
Իր վրա հարձակված անձինք իր բերանը կապելուց հետո փորձում էին հանել իր ձախ ձեռքի ոսկե մատանիները, որոնք երեքն էին՝ նույն մատին դրված:
Ոստիկանները գտել են խոհանոցի հատակին ընկած մեկ ոսկե մատանին: Մյուս երկու ոսկե մատանիները ավազակները հափշտակել են:
Հյուրասենյակի զարդատուփի մեջ եղել են տոպազ քարով ոսկե մատանի, ձեռքի արժեքավոր ժամացույց, դրանք չեն հափշտակել: Պահարանում եղել է հինգ հատ հազար դրամանոց, դրանք նույնպես չեն հափշտակել:
Չեն հափշտակել նաև իր դրամապանակում եղած գումարը՝ մոտ տասնութ հազար դրամ:
Տուժողն ասել է, թե իր վրա հարձակված անձանց տեսնելու դեպքում չի ճանաչի: Չնայած մեկի դիմակը պատռել, դեմքն ինչ-որ չափով տեսել է, բայց չի կարող նկարագրել: Հիշում է, որ իրեն մուտքի մոտ հետևից գրկած անձի գլուխը հավասար է եղել իր ուսին:
Տուժողն ասել է, որ եղբոր զավակներ ունի, ովքեր արտերկրում են: Կուտակած գումար երբևէ չի ունեցել: Ապրել է իր աշխատավարձով ու եղբոր որդու ամենամսյա օգնությամբ: Շփվում է սահմանափակ թվով մարդկանց հետ:
Այնուհետև տուժողն իր ներկայացուցչի միջոցով դատարանին է ներկայացրել դիմում՝ հայտնելով, որ ամբաստանյալ Նաիրի Մարությանի հարազատները փոխհատուցել են իրենից հափշտակված զարդերի արժեքը՝ 2 միլիոն 350 հազար դրամ, նույնքան գումար էլ՝ 2 միլիոն 350 հազար դրամ, հատուցել են՝ իր առողջության վերականգնման համար, ընդհանուրը՝ իրեն տվել են 4 միլիոն 700 հազար դրամ, ինքը ամբաստանյալ Մարությանից այլևս քաղհայցի պահանջ չունի:
Տուժողը դատարանին դիմելով հայտնել է նաև, որ վատառողջ է, ունի լուրջ առողջական ու հոգեբանական խնդիրներ, ի վիճակի չէ ներկայանալու դատարան…
Տուժողի տանը կատարվող հանցագործության պահին շատ անհանգիստ է եղել հարևանի շունը: Դա դրդել է հարևանին՝ ավելի ուշադիր ականջ դնելու, նա լսել է հարևանուհու օգնության կանչերը ու ոստիկանություն է ահազանգել:
Ոստիկանները ժամանել են, տուժողին գտել են խոհանոցի հատակին կիսանստած: Նրա ոտքերն ու ձեռքերը կապված են եղել կպչուն ժապավենով, դեմքը եղել է ծեծված, ատամները՝ գետնին ընկած: Բնակարանում իրերը խառնված են եղել, տեղաշարժված, պահարանները եղել են բացված: Շենքի առաջին հարկի աստիճանահարթակից՝ աղբամանի մոտից, հայտնաբերվել է կանացի զուգագուլպա:
Տուժողի վիճակը լավ չի եղել, նրան տարել են հիվանդանոց:
Նաիրի Մարությանը դեպքի վայրում կատարված քննչական փորձարարության ժամանակ հանգամանորեն նկարագրել է, թե ինչպես է ընկերոջ հետ դիմակավորված հարձակվել տուժողի վրա:
Դատարանը հաստատված չի համարել նախաքննական մարմնի առաջադրած մեղադրանքը՝ այն, որ ավազակային հարձակմամբ տուժողի տնից հափշտակվել է առանձնապես խոշոր չափերի գույք: Չփարատված կասկածները մեկնաբանելով հօգուտ ամբաստանյալի՝ դատարանը Նաիրի Մարությանի արարքը ՀՀ քրեական օրենսգրքի 175 հոդվածի 3-րդ մասի 1-ին կետից վերաորակել է 175 հոդվածի 2-րդ մասի 1-ին, 2-րդ, 3-րդ կետերով:
Նաիրի Մարությանը դատապարտվել է 6 տարի ազատազրկման: Պատժի սկիզբը՝ 2014 թվականի նոյեմբերի 18-ից:
