ԱԺ ԲՀԿ խմբակցության պատգամավոր Վարդան Բոստանջյանի խոսքերով, մեր հանրապետությունում սոցիալ-տնտեսական իրավիճակն այնպիսին է, ինչպիսին կա և իհարկե բարվոք վիճակում չէ. «Հիմա անկախ սոցիոլոգիական այդ հարցումների` Gallup-ը կլինի, թե մեկ այլ կազմակերպություն, որոնց թվերը կարող են մի փոքր աջ կամ ձախ սխալներ ունենալ, փաստն այն է, որ մեր բնակչության մի ստվար զանգված սոցիալական առումով շատ վատ վիճակում է, և մենք էլ դա հասկանում ենք»:
Բոստանջյանը նկատեց, որ այսօր կառավարությունն ու երկրի նախագահը քայլեր են ձեռնարկում այդ իրավիճակը բարելավելու ուղղությամբ:
Նշենք, որ Gallup կենտրոնը124 երկրում հետազոտություն է իրականացրել` պարզելու, թե ինչպես են իրենց կյանքը գնահատում տեղաբնակները և ինչ են ակնկալում առաջիկա հինգ տարիների ընթացքում:
Պարզվում է ՀՀ բնակչության 54 տոկոսը թե՛ այժմ և թե՛ առաջիկա հինգ տարիների համար կարծում է, որ ինքը պայքարում է գոյատևման համար:
Բոստանջյանը նկատեց, որ ինքը շատ լավ հասկանում է բնակչության նման հոռետեսական դիրքորոշումը. «Մարդիկ կարողանում են ճիշտ կողմնորոշվել և տեսնելով այսօրվա իրավիճակը, երբ զանգվածների զգալի մասը եկամուտներ չունի և մտածում է, որ չի ունենալու, հաշվի առնելով աշխատատեղերի բացակայությունը, ավելին` գնաճի աճող տեմպերը, հասկանում են, որ իրենց բարեկեցության բարձրացման համար սցենարները կարծես թե դեպի վատն են գնում»:
Ըստ Բոստանջյանի` հաշվի առնելով ստեղծված իրավիճակը, որևէ միտում չի նկատվում, որ վաղը լավ կլինի, իսկ մարդիկ էլ չեն կարող իրենց պատրանքների դաշտն ընկնել ու մտածել, որ վաղը լավ կլինի: Բոստանջյանի խոսքերով դրանով են նաև պայմանավորված արտագաղթի մեծ չափերը. «Հայ ժողովուրդը երևի թե դադարել է բողոքել որևէ մեկին` հասկանալով, որ դա որևէ ազդեցություն չի ունենա, դրա համար էլ բավականին նկատելի ձևով հեռանում են երկրից և մտածում, որ այլ երկրում կկարողանան եթե ոչ արժանավայել, բայց գոնե ապրել»:
