Առանձնապես հարձակման երևույթներ չկան, տեսական վտանգներ գոյություն չունեն,- «Առաջին լրատվական»-ի հետ զրույցում հավաստիացրեց Ստամբուլի «Ժամանակ» օրաթերթի խմբագիր Արա Գուչունյանը՝ անդրադառնալով հայկական թաղամասերի վրա հարձակումներին և հավելեց.
«Թուրքիայի ներքին քաղաքական կյանքում ուժերի վերադասավորման գործընթաց է ընթանում, շուտով ընտրությունները պիտի կրկնվեն. սա աննախադեպ է, որ Սահմանադրությամբ նախատեսված լիազորությունների հիման վրա հանրապետության նախագահի նախաձեռնությամբ կրկնվում են ընտրությունները: Ներքաղաքական փակուղային իրավիճակ է առաջացել, որն ուղեկցվել է ահաբեկչական գործողություններով. բազմաթիվ անվտանգության պաշտոնյաներ, զինվորականներ, ոստիկաններ զոհ գնացին: Ահաբեկչությունը հասարակության մեջ հիասթափություն և մեծ պոռթկում առաջացրեց՝ ցույցեր, բողոքի ալիք»:
Անդրադառնալով այն հարցին, թե ինչ հույսեր կարող ենք կապել քրդական կուսակցության հետ, Ա. Գոչունյանը պատասխանեց. «Թուրքիայում ոչ մի կուսկցություն գոյություն չունի, որը ճանաչում է Հայոց ցեղասպանությունը, գոյություն չունի քրդական կուսակցություն, որպես այդպիսին, քանի որ օրենսդրորեն հնարավոր չէ դավանական կամ էթնիկական պատկանելիության հիման վրա կուսակցություն հիմնել: Թուրքիան բազմաշերտ հասարակություն է, և բացառապես մեր շահերից չի բխում, որ հայ համայնքը հասարակության ինչ-որ խավերից մարդկանց հետ նույնացած կամ իր շահերը նրանց հետ համատեղած դիրքերի մեջ լինի: Իշխանության գլուխ ով էլ որ գտնվի, դա չի փոխում այն իրականությունը, որ մեր իրավունքները, որպես կրոնական փոքրամասնություն, երաշխավորված են պետության կողմից»:
Թուրքիայում տեղի ունեցող բախումների վերաբերյալ Ա. Գոչունյանը նշեց, որ այնտեղ դրանք չեն ընկալվում որպես թուրք-քրդական բախում, այլ «Թուրքիայի օրակարգում այսօր գոյություն ունի ահաբեկչության խնդիր, որը պետությունը փորձում է հաղթահարել»:
Մանրամասները՝ տեսանյութում:
