Գերմանացի պաշտոնաթող գեներալ Կլաուս Ռայնհարդը, որը 1999-2000 թթ. ղեկավարում էր ՆԱՏՕ-ի ուժերը Կոսովոյում (KFOR), հանդես է եկել Քադաֆիի հետ խաղաղ բանակցություններ սկսելու առաջարկությամբ: Այս մասին գրում է Die Welt-ը:
Գեներալը հայտարարել է, որ ժամանակն է դադարեցնել նոր ռազմական միջոցներ որոնելը, որոնք կարող են օգնել Լիբիային:
Ռազմական օպերացիայի ժամանակ, որն արդեն մեկ ամիս է տևում, Քադաֆիին կոտրել այդպես էլ չի հաջողվել: Այսպիսով, ըստ Ռայնհարդի, ներկա պահին պետք է գործադրել բոլոր հնարավոր միջոցները հրադադարի հասնելու համար. միայն դա կարող է օգնել լիբիացիներին:
«Պետք չէ լսել միայն ապստամբներին, պետք է նաև գործողություններ իրականացնել, որոնք վերջ կտան պատերազմին»,- նշել է գեներալը:
Կլաուս Ռայնհարդը իրենց դիրքորոշման համար քննադատության է ենթարկել արևմտյան առաջնորդներին, որոնք «միաձայն հայտարարում են, թե ցանկանում են հեռացնել Քադաֆիին»:
Պաշտոնաթող գեներալի կարծիքով, ընդհակառակը, Քադաֆին պետք է, որպեսզի սկսվեն խաղաղ բանակցությունները: KFOR-ի նախկին հրամանատարը հղում է կատարել իր` Բալկաններում ունեցած փորձին, երբ ռմբակոծումից հետո Սերբիայում սկսվեցին խաղաղ բանակցությունները:
«Դրանց (բանակցություններին.– 1in.am) մասնակցում էր նաև Միլոշևիչը` գլխավոր ռազմական հանցագործը»,- նշել է Ռայնհարդը՝ ավելացնելով, որ Հարավսլավիայի առաջնորդը հետագայում էլ է մասնակցել Փարիզում ընթացող խաղաղ բանակցություններին: «Եվ այդ ժամանակ ոչ ոք չէր վախենում բանակցել հակառակորդ կողմի հետ»,- ասել է Կլաուս Ռայնհարդը:
