«Մենք ամեն ինչ արել ենք և պետք է անենք, որպեսզի կարողանանք այս տարվա համար կանխատեսված ցուցանիշներն ապահովել»,- այսօր լրագրողների հետ ճեպազրույցի ժամանակ ասաց էկոնոմիկայի նախարար Կարեն Ճշմարիտյանը։ Վերջինիս խոսքով՝ այնուամենայնիվ, ինչ որ պահի հնարավոր է լինում արտաքին ազդեցությունները չեզոքացնել։
«Այնուամենայնիվ, ես կարծում եմ, որ մենք բոլոր ջանքերը պետք է ներդնենք՝ աջակցելու մեր գործարարությանը»,- հավելեց Ճշմարիտյանը։
«Առաջին լրատվական»-ը Ճշմարիտյանից հետաքրքրվեց՝ ԵՏՄ գոտում միասնական արժույթով առևտուր անելու Հովիկ Աբրահամյանի առաջարկին արձագանքներ եղե՞լ են, և իր կարծիքով՝ որո՞նք են Ռուսաստանի համար ռազմավարական ոլորտները, որտեղ ՌԴ-ն կհամաձայնի Հայաստանի հետ ռուբլով առևտուր անել։ «Դա արդեն կախված է մեր գործընկերներից, նրանց արձագանքներից։ Իհարկե, լավ կլիներ, որ այն ապրանքները, որոնք գնվում են տվյալ երկրից, իրենց դրամով վճարեինք։ Բայց դեռ արձագանքներ չկան անգամ գազի մասով»,- ասաց Ճշմարիտյանը։
