Այսօր Երևանում ներկայացվեց Հայաստանի զբոսաշրջության հարավային միջանցքի ռազմավարական ծրագիրը: Նախագիծը պատրաստվել է «AECOM» ընկերության կողմից` ՀՀ էկոնոմիկայի նախարարության և Հայաստանի ազգային մրցունակության հիմնադրամի նախաձեռնությամբ: Զբոսաշրջության հարավային միջանցքը ընդգրկում է Վայոց Ձորի մարզի Արենի գինեգործական շրջանից մինչև Տաթև-Գորիս ընկած տարածքը, որը բաժանվել է 5 կլաստերների` ներառյալ Եղեգնաձորը, Սիսիանը, Գորիսը, Տաթևը և Ջերմուկը:
«Եթե մենք արդեն Տաթևի ու Ջերմուկի ծրագրով հետաքրքրություն ենք ստեղծել, չենք ուզում, որ հետևանքը լինի ոչ կազմակերպված զարգացում, որը ոչ օպտիմալ ուղղությամբ կտանի զարգացումները, հետևաբար այս հարավային միջանցքի ծրագիրը շատ կարևոր է»,- ասաց Հայաստանի ազգային մրցունակության հիմնադրամի գործադիր տնօրեն Բեկոր Փափազյանը: Էկոնոմիկայի փոխնախարար Արա Պետրոսյանն էլ իր խոսքում նշեց, որ սա «հախուռն զարգացումից» զարգացման «պլանավորված սխեմաների» անցնելու քայլ է:
