Ֆրանսիան Կենտրոնական Աֆրիկայի Հանրապետություն է ուղարկել 350 զինծառայող՝ ապահովելու այդ երկրում գտնվող ֆրանսիացի քաղաքացիների ու այլ արտասահմանցիների անվտանգությունը: Այս մասին հայտնում է Agence France-Presse-ը:
200 զինծառայողից կազմված առաջին խումբը Ֆրանսիան Կենտրոնական Աֆրիկայի Հանրապետության մայրաքաղաք Բանգի է ուղևորվել մարտի 23-ին: Մնացած 150 զինծառայողը Բանգի է ուղևորվել Գաբոնի մայրաքաղաք Լիբրևիլից:
Այսպիսով՝ ներկայում Կենտրոնական Աֆրիկայի Հանրապետությունում է գտնվում 600 ֆրանսիացի զինծառայող:
Ավելի վաղ՝ մարտի 23-ին, հաղորդվել էր, որ ապստամբները մտել են Բանգու՝ գրավելով երեք էլեկտրակայաններ: Մարտի 24-ին ապստամբները ամբողջությամբ իրենց վերահսկողության տակ էին վերցրել քաղաքն ու գրավել նախագահական նստավայրը: Երկրի նախագահ Ֆրանսուա Բոզիզոն փախել է երկրից հարևան Կոնգոյի Դեմոկրատական Հանրապետություն:
Ինչպես հաղորդում է BBC News-ը, խաղաղարարները փորձել են օգնել կառավարական ուժերին՝ կասեցնելու ապստամբների գործողությունները, սակայն անհաջողության են մատնվել: Ներկայում խաղաղապահները պատրաստվում են հեռանալ աֆրիկյան այդ պետությունից:
