«Ինքս կողմ եմ բանակցություններով, փոխզիջումներով խնդիրը հանգուցալուծելուն: Մենք ի սկզբանե սխալ ճանապարհով ենք գնում, և վաղուց ժամանակն է դուրս գալ այս որոգայթից: Մեզանում ընտրություններ չեն եղել ու դեռ երկար ժամանակ չեն լինելու»,- «Առաջին լրատվական»-ի հետ զրույցում ասաց «Վերելք» քաղաքական ուսումնասիրությունների հիմնադրամի նախագահ Արծրուն Պեպանյանը՝ անդրադառնալով ՀՀ նախագահի նախկին թեկնածու, «Ժառանգություն» կուսակցության առաջնորդ Րաֆֆի Հովհաննիսյանի կողմից Սերժ Սարգսյանին ուղղված առաջարկներին։
«Բայց և մյուս կողմից՝ Րաֆֆի Հովհաննիսյանին խորհուրդ են տվել իշխանություններին ներկայացնել այնպիսի առաջարկ, որը նույն այդ խորհուրդ տվողները չէին ընդունի, եթե իրենք լինեին իշխանությունների տեղում: Այդ առաջարկներն ընդունելու դեպքում՝ ԱԺ արտահերթ ընտրություններից հետո նախագահը կհայտնվեր Սահակաշվիլիի վիճակում: Այնպես որ, ցանկալի կլիներ ընդդիմությունը փոխադարձաբար ընդունելի առաջարկներ ներկայացներ. երկրի շահն ավելի կարևոր է կողմերի ամբիցիաներից: Քաղաքական գործիչներն ասպետներ չեն, որ ինքնասպան լինեն երդմնազանցության պարագայում: Քաղաքականությունը հնարավորինի արվեստ է, և այստեղ թույլատրվում է խոսքը ետ վերցնել՝ հանուն hայրենիքի շահի, բանակցել, հանգուցալուծում գտնել»,- հավելեց Ա. Պեպանյանը:
Նրա կարծիքով՝ ճշմարիտ քաղաքական գործիչները նրանք են, ովքեր կարողանում են գտնել երկրի համար պակաս ցավոտ, առավել արդյունավետ ուղին՝ թեկուզ իրենց հեղինակության անկման հաշվին:
Հիշեցնենք, որ պաշտոնական տվյալներով վերընտրված նախագահ Սերժ Սարգսյանին «Ժառանգության» առաջնորդ Րաֆֆի Հովհաննիսյանն առաջարկել է իր թիմին փոխանցել հինգ մարզպետներ նշանակելու իրավասությունը, ինչպես նաև կառավարության և պետական ծառայությունների ութ ոլորտների ղեկավարությունը, դրանց թվում են` դատախազությունը, հարկային և մաքսային ոլորտը, ազգային անվտանգության ծառայությունը, արտգործնախարարությունը, կրթության և գիտության նախարարությունը, վերստուգիչ ոլորտը, արդարադատության խորհուրդը, հակակոռուպցիոն հանձնաժողովը:
