Պահպանողական կուսակցության ներկայացուցիչ, հայ-բրիտանական պատգամավորական խմբի անդամ Ջոն Վիկինգդեյլը, պատմելով Հայոց Ցեղասպանության հուշահամալիր և թանգարան այցելության մասին, նշեց, որ Հայաստանի վերաբերյալ կան շատ հանգամանքներ, որոնցից Բրիտանիայում տեղյակ չեն: Վիկինգդեյլը այսօր լրագրողներին տեղեկացրեց, որ Բրիտանիա վերադառնալուն պես, ինքը համայնքների պալատում կներկայացնի այն ամենը, ինչին ականատես է եղել Լեռնային Ղարաբաղում:
«Մեզանում շատ թյուր տեղեկություններ կան այդ ամենի վերաբերյալ: Ցեղասպանության մասին էլ Բրիտանիայում շատ քչերն են տեղյակ, թե իրականում ինչ է կատարվել: Մենք չափազանց շատ ժամանակ ենք անցկացնում Հոլոքոստի վերաբերյալ տեղեկությունների վրա, բայց ես ցնցված եմ, որ Հայոց Ցեղասպանությունն իրապես տեղի է ունեցել, սակայն քչերն են իրազեկված»,- նկատեց Վիկինգդեյլը և հավելեց, որ ինքը Հայոց ցեղասպանության թանգարանից որոշ ցուցանմուշներ է վերցնելու և բրիտանական խորհրդարանում ցուցահանդես է կազմակերպելու, որպեսզի իր գործընկերները իրազեկվեն, թե ինչ է տեղի ունեցել:
Հայ-բրիտանական պատգամավորական խմբի անդամ բարոնուհի Շիլա Ֆլավըրն էլ նշեց, որ այս այցի ընթացքում ինքը բավական մանրամասնորեն է տեղեկացել Հայոց ցեղասպանության մասին. «Ինձ համար անընդունելի է, որ այդքան ապացույցներ կան, սակայն մեր կառավարությունը դեռևս չի ճանաչել Հայոց ցեղասպանության փաստը, սակայն և՛ մենք, և՛ դուք գիտենք, որ դրա պատճառը Թուրքիան է: Բայց դա մեզ չի խանգարելու, որպեսզի ճանաչման ուղղությամբ շարունակենք ջանքեր գործադրել, քանզի 1915 թ. տեղի ունեցածը հանցագործություն է մարդկության նկատմամբ»:
Բրիտանական խորհրդարանի ընդդիմադիր ներկայացուցիչ, հայ-բրիտանական պատգամավորական խմբի անդամ Լինդոն Հարիսոնն էլ նկատեց, որ իրենք պետք է ամեն ինչ անեն, որպեսզի Բրիտանիայում լավ ըմբռնեն Ցեղասպանության փաստը. «Այն, ինչ մենք տեսանք Ցեղասպանության զոհերի հուշահամալիրում, կհիշենք միշտ: Իսկ ապրիլի 24-ին մենք կհիշենք, որ միլիոնավոր հայեր կհավաքվեն Ցեղասպանության հուշահամալիրի մոտ բազում ծաղիկներով, և այդ պատկերը անընդհատ մեր հիշողության մեջ կլինի»:
