Օրեր առաջ հաղորդվել է Լիտվայի Սեյմում Լիտվա-ԼՂՀ բարեկամության խմբի ստեղծման մասին: Այս մասին Analitika.at.ua-ի հետ զրույցում մեկնաբանություն է տվել ուկրաինացի քաղաքագետ Միխայիլ Բելեցկին:
«Առաջին բանը, որ կցանկանայի նշել այդ առնչությամբ, քայլի նորմալ և բնական լինելն է, երբ պետության խորհրդարանում ձևավորվում է պատգամավորների խումբ, որի նպատակն է բարեկամական հարաբերություններ զարգացնել ցանկացած պետության հետ՝ ճանաչված կամ չճանաչված: Նույնքան բնական ինձ կթվար Ուկրաիանյի Գերագույն ռադայում Ռուսաստանի, Ֆրանսիայի, Հայաստանի, Ադրբեջանի կամ ԼՂՀ-ի հետ բարեկամության խմբերի ստեղծումը: Պարզ է, որ նման խմբերի ստեղծումը պետք է լինի այս կամ այն երկրին համակրող պատգամավորների կամավոր գործը: Ես չէի կրկնի այդ ակնհայտ բաները, եթե չլիներ Ադրբեջան-Լիտվա բարեկամության խմբի տարօրինակ քայլը, որով խմբի ստեղծման առնչությամբ դժգոհություն է արտահայտվել»:
«Լիտվայում ԼՂՀ-ի հետ բարեկամության խմբի ստեղծումը այնքանով է բնական, որ Լիտվայում կան Լեռնային Ղարաբաղին կարեկցելու և աջակցելու հնագույն ավանդույթներ, որոնք գալիս են այն ժամանակներից, երբ Ղարաբաղն առաջին անգամ դրեց իր անկախության մասին հարցը: Հիշեցնեմ, որ այդ ժամանակ Լեռնային Ղարաբաղի պահանջը աջակցել է նաև Միության ողջ տարածքի, այդ թվում՝ Ուկրաինայի ժողովրդական հասարակությունը:
Ըստ երևույթին՝ բարեկամության խմբի մասնակից պատգամավորները որոշակի պատկերացում ունեն կոնկրետ քայլերի մասին, որոնք նրանք մտադիր են ձեռնարկել դրա շրջանակում: Կարելի է սպասել, որ նրանք կաջակցեն մշակութային և տնտեսական կապերի զարգացմանը և «ժողովրդական դիվանագիտության» շրջանում կնպաստեն մեկուսացման հաղթահարմանը, որում գտնվում է Ղարաբաղը»,- նշել է քաղաքագետը:
Հիշեցնենք, որ Լիտվայի Սեյմը մարտի 14-ին լիագումար նիստի ժամանակ պաշտոնապես հայտարարել է չճանաչված Լեռնային Ղարաբաղի հետ միջկառավարական կապերի խմբի ստեղծման մասին: Խորհրդարանի փոխխոսնակ, Աշխատանքային կուսակցության պատգամավոր Վիտաուտաս Գափշիսը կարդացել էր խմբի ստեղծման մասին պաշտոնական հայտարարությունը: Նա հրավիրել էր ցանկացողներին միանալ խմբին և հայտարարել խմբի՝ ծրագրվող առաջին հանդիպման մասին:
