ԱՄՆ նախագահ Բարաք Օբաման առաջարկել է ստեղծել 2 մլրդ դոլար տնօրինող հիմնադրամ՝ հաջորդ 10 տարում «մաքուր» էներգետիկայի ֆինանսավորման համար:
Այդ հիմնադրամի միջոցները կապահովվեն ամերիկյան շելֆում հորատումից, հաղորդում է CNN հեռուստաալիքը:
Առաջին անգամ նման հիմնադրամի ստեղծման մասին Օբաման հայտարարեց այս տարվա փետրվարին Կոնգրեսին ուղղված իր դիմումում: Նրա առաջարկը հնչել է Չիկագոյի մոտակայքում Արգոն ազգային լաբորատորիայում ելույթի ժամանակ, որտեղ մշակվում են մարտկոցներ էլեկտրամոբիլների ու հիբրիդների համար:
«Վառելիքի գների աճի փակ շրջանից դուրս գալու միակ եղանակը մեր ավտոմեքենաները՝ ուղևորատար ու բեռնատար, էներգիայի այլ աղբյուրի փոխադրելն է: Սա ո՛չ դեմոկրատների, ո՛չ հանրապետականների գաղափարը չէ: Սա պարզապես խելացի գաղափար է»,- ասել է Օբաման:
Energy Security Trust անվանումը կրող հիմնադրամի միջոցներն օգտագործվելու են վառելիքի խնայողական օգտագործման ու դրա նոր տեսակների, այդ թվում՝ բիովառելիքի, բնական գազի ու էլեկտրականության հետազոտական աշխատանքների համար:
Չնայած Օբամայի հավաստիացմանը, թե հիմնադրամի ստեղծմանն աջակցելու են նաև հանրապետականները, վերջիններս դեմ են այդ գաղափարին:
Հիմնադրամի ստեղծման համար Օբաման պետք է ստանա Կոնգրեսի համաձայնությունը:
