«Ժառանգության» առաջնորդն ընդդիմադիր ավելի խոշոր ուժերի աջակցության կարիք ունի: Այսօր «Առաջին լրատվական»-ի հետ զրույցում այս մասին ասաց քաղաքագետ Գագիկ Համբարյանը:
Ըստ քաղաքագետի՝ խնդիրն այն է, որ Րաֆֆի Հովհաննիսյանը, «երկարաձգելով» իր հեղափոխությունը, հուսախաբ է անում ժողովրդին, որը արդեն չի էլ հավատում, որ որևէ բանի կհասնեն Թատերական հրապարակում անվերջանալի հանրահավաքներով: Ուստի, Գագիկ Համբարյանի խոսքերով, «Ժառանգություն» կուսակցության առաջնորդն արդեն ընդդիմադիր ավելի խոշոր ուժերի աջակցության կարիքն ունի:
«Հեղափոխական գործընթացը ձախողված է, իրենց նախընտրական քարոզչության ժամանակ «Ժառանգություն» կուսակցության ներկայացուցիչներն ավելի վեհ դիրքերից էին հանդես գալիս, հայտարարում, թե որ ուժերը կողմ են իրենց նախաձեռնած գործընթացին, կարող են միանալ, իրենք պետք է առաջարկություն անեն, բայց այս պահին իրավիճակն ամբողջությամբ փոխվել է։ «Ժառանգություն»-ում հասկանում են, որ այսպես շարունակել հնարավոր չէ»,- ասաց Գագիկ Համբարյանը, ապա հավելեց, որ ինչպես ժամանակին Լևոն Տեր-Պետրոսյանից հեռացան շատ-շատերը, այնպես էլ ժողովուրդը կհեռանա Րաֆֆի Հովհաննիսյանից:
Անդրադառնալով վերջինիս հացադուլի քայլին՝ քաղաքագետն ասաց, որ Հայաստանում հացադուլը շատ մոդայիկ երևույթ է դարձել. « Իմ կարծիքով՝ հացադուլ անելով հարց չի լուծվի: Կարևորը հետյալն է, որ բոլոր քաղաքական ուժերը իրենց ծայրահեղական դրսևորումները մի կողմ դնեն և ծրագրով հանդես գան»։
Հիշեցնենք՝ «Ժառանգություն» խորհրդարանական խմբակցության ղեկավար Ռուբեն Հակոբյանը երեկ նշել էր, որ հետընտրական այս զարգացումներն ի վերջո հանգեցնելու են դրական հանգուցալուծման, և Րաֆֆի Հովհաննիսյանը ստանձնելու է նախագահի պաշտոնը: «Ընդդիմությունը կարող է իր դե ֆակտո հաղթանակը դարձնել դե յուրե»,- ասել էր նա:
