Ավստրիացի կարդինալ Քրիստոֆ Շենբորնի մայրը Kleine Zeitung թերթին տված հարցազրույցում հայտարարել է, որ հույս ունի՝ իր որդին կպարտվի Հռոմի պապի ընտրություններում,- փոխանցում է lenta.ru-ն:
92-ամյա Էլեոնորա Շենբորնի խոսքով՝ կարդինալի ամբողջ ընտանիքը մտավախություն ունի, որ եթե նա դառնա պապ, հարազատները նրան այլևս երբեք չեն տեսնի, քանի որ նա ամբողջովին կլանված կլինի «վատիկանյան ինտրիգներով»:
Կինն ասել է, որ լավ հիշում է նախորդ պապի խոսքերը, թե ինքն «ամբողջովին պատկանում է եկեղեցուն»: «Եթե ընտրեն՝ ինձ համար ամեն ինչ կվերջանա: Ես էլ ուժ չունեմ Հռոմ ուխտագնացության համար»,- ասել է պապի ամենաիրական հավակնորդներից մեկը համարվող կարդինալի մայրը:
Նա ասել է, որ իր որդին իրեն մի քիչ մխիթարել է Վատիկան մեկնելուց առաջ՝ ասելով, որ «դժվար թե Հռոմի պապ դառնա»:
Քրիստոֆ Շենբորնն ու նրա 114 գործընկեր-կարդինալները տարբեր երկրներից և մայրցամաքներից մարտի 12-ին մասնակցել են Հռոմի նոր պապի ընտրության գործում աստվածային աջակցության շնորհի համար միասնական աղոթքին,- հայտնում է Reuters-ը:
Աղոթքից և հանդիսավոր պատարագից հետո կարդինալները տեղական ժամանակով 16:30-ին կառանձնանան Սիքստինյան կապելլայում՝ հատուկ վայրում, որտեղ կսկսեն 226-րդ պապի պաշտոնի թեկնածուների քննարկումը:
Հռոմի նախորդ պապ Բենեդիկտոս XVI-ը 2013-ի փետրվարին հրաժարվել է Սուրբ գահից:
