Ինչպես հայտնի է, մարտի 9-ի հրամանագրով Սերժ Սարգսյանն իր փեսա Միքայել Մինասյանին նշանակել է Սուրբ աթոռում Հայաստանի Հանրապետության արտակարգ և լիազոր դեսպան: Այս նշանակումը տարրեր մեկնաբանությունների տեղիք է տվել: «Ժողովուրդ»-ը զրուցել է Աժ-ում հայտնված Միքայել Մինասյանի մտերիմ ընկերների հետ՝ պարզելու, թե արդյոք, նրանց կարծիքով, Մինասյանը Հայաստանից հեռանալու ցանկություն ուներ:
ԱԺ ՀՀԿ խմբակցության պատգամավոր, Միացյալ ազատական ազգային կուսակցության անդամ (ՄԻԱԿ) ԼԵՎՈՆ ՄԱՐՏԻՐՈՍՅԱՆ
– Որպես Միքայել Մինասյանի մտերիմ՝ Ձեր կարծիքով՝ ինչո՞ւ ՀՀԿ առաջնորդ Սերժ Սարգսյանը որոշեց նրան Վատիկանում դեսպան նշանակել: Եվ ինչո՞ւ Մինասյանը համաձայնեց:
– Իսկ ինքն արդեն երկրից դո՞ւրս է եկել:
– Դեռ ոչ, բայց եթե նշանակել են դեսպան, ուրեմն շուտով դուրս է գալու:
– Ես այս վերջերս իր հետ չեմ հանդիպել, հիմա վստահ չեմ՝ երկրում է, թե ոչ, բայց, ինչքան գիտեմ, դեռ չի մեկնել: Այդ հարցն իրեն ուղղեք, ինչո՞ւ եք ինձ տալիս: Կարող է՝ դուրս է գալու, կարող է՝ դուրս չի գալու: Ես այս պահի դրությամբ իր հետ չեմ զրուցել և չգիտեմ իր պլանների մասին:
– Իսկ ըստ Ձեզ՝ ինչո՞ւ է Մ. Մինասյանը համաձայնել դեսպանի պաշտոնին: Գուցե ինչ– որ պատճառներ է ունեցել որոնց մասին Դուք՝ որպես Մինասյանի մտերիմ ընկեր, տեղյակ եք: Անձամբ զրուցե՞լ եք Մ. Մինասյանի հետ, նա ի՞նչ կարծիք ունի իր նոր պաշտոնի մասին:
– Ես իր հետ խոսել եմ, բայց այդ հարցի շուրջ չեմ խոսել, դեռևս առիթ չի եղել: Առիթ չի եղել այդ թեմայի մասին խոսել, երբ որ առիթ լինի, խոսեմ, այդ մասին ես Ձեզ հետ կկիսվեմ: Իսկապես, այդ հարցերի հետ կապված՝ պետք է իր հետ խոսեք կամ իր օգնականներից մեկի հետ, որովհետև այն հարցը, թե ինչու ինքը համաձայնեց, ինչու չհամաձայնեց, դա ինձ հետ ի՞նչ կապ ունի:
– Քաղաքական որոշ շրջանակների պնդմամբ՝ Ս. Սարգսյանը Մ. Մինասյանին այս կերպ «աքսորել» է, քանի որ Ս. Սարգսյանի թիմակիցները շատ դժգոհ էին նրանից: Դուք համամի՞տ եք:
– Բացարձակ, նախ՝գործուղելը չի նշանակում արտաքսել, դա շատ բարձր և պատվաբեր պաշտոն է: Եվ ես չգիտեմ պարոն Մինասյանն ամբո՞ղջ ժամանակն է անցկացնելու Իտալիայում, թե՞ ժամանակի որոշակի մասը: Երրորդն էլ՝ դժգոհություն ասվածն ընդհանրապես իրականությանը չի համապատասխանում, դրա մասին ընդհանրապես խոսք լինել չի կարող քանի որ, իմ կարծիքով, պարոն Մինասյանը չափազանց էֆեկտիվ աշխատող է եղել նախագահ Սերժ Սարգսյանի թիմում:
–Կարելի՞ է Ս. Սարգսյանի փեսայի՝ նման ձևով երկրից հեռանալը համարել արտագաղթ:
– Բացարձակ, ինչի՞ մասին է խոսքը: Եվ պարոն Մինասյանը, և մեզանից շատերը գործով մեկնում են արտերկիր և վերադառնում, դա ոչ մի կերպ արտագաղթ համարել չի կարելի:
– Տեսակետ կա նաև, որ Հայաստանում առկա խառը իրավիճակը հաշվի առնելով, Սարգսյանը փորձել է այդ ամենից հեռու պահել իր փեսային ու նրա ընտանիքը: Իսկ երբ իրավիճակը հանդարտվի, Մինասյանը նորից կվերադառնա Հայաստան:
– Բայց ի՞նչ խառը իրավիճակ է Հայաստանում: Ես գոնե չեմ նկատում խառը իրավիճակ, շատ նորմալ իրավիճակ է Հայաստանում: Նախկինում Հայաստանում եղել են խառը իրավիճակներ, բայց սա այդ դեպքը չէ, բացարձակապես:
– ժողովուրդը դուրս է եկել Ազատության հրապարակ ու պահանջում է անվավեր ճանաչել ընտրությունների արդյունքները, քանի որ դրանք կեղծվել են: Րաֆֆի Հովհաննիսյանը հացադուլ է հայտարարել ու նշել, որ միայն իր դիակի վրայով ապրիլի 9-ին Սերժ Սարգսյանը կերդվի: Ըստ Ձեզ՝ դա նորմա՞լ իրավիճակ է:
– Խառը իրավիճակ չկա Հայաստանում, շատ կայուն, հանդարտ իրավիճակ է: Դե գիտեք ինչ, կարող է ամեն մեկս մի բան հայտարարենք, դրանից անկայունություն չի ստեղծվում: Շատ նորմալ իրավիճակ է, գոնե ես անկայունություն չեմ նկատում:
– Իսկ Ձեր կարծիքով՝ լա՞վ է, որ ՀՀԿ առաջնորդ Ս. Սարգսյանի փեսան գնում է Հայաստանից:
– Երբ գնա երկրից, ու երբ ինչ-որ նորություն լինի, այդ ժամանակ… այս պահի դրությամբ որևէ անհանգստանալու բան չկա:
Աժ ՀՀԿ խմբակցության պատգամավոր, ՀՀԿ անդամ ՍԱՄՎԵԼ ՖԱՐՄԱՆՅԱՆ
– Պարոն Ֆարմանյան, Դուք ևս շատ մտերիմ փոխհարաբերություններ ունեք Ս. Սարգսյանի փեսայի՝ Միքայել Մինասյանի հետ, ըստ Ձեզ՝ ինչո՞ւ Մինասյանը համաձայնեց լքել Հայաստանը:
– Ես հեռախոսային հարցազրույցներ չեմ տալիս: Որևէ թեմայի շուրջ ես չեմ խոսում:
ՀԳ. Փորձեցինք զրուցել նաև ԱԺ ՀՀԿ խմբակցության անդամ Նաիրա Կարապետյանի հետ, որը ևս համարվում է Մ. Մինասյանի մտերիմներից մեկը: Սակայն. վերջինս հեռախոսազանգերին համառորեն չէր պատասխանում:
