Վրացական IPN լրատվական գործակալության փոխանցմամբ՝ Եվրոպական խորհրդի նախագահ Դոնալդ Տուսկը երեկ Թբիլիսիում Վրաստանի նախագահ Գեորգի Մարգվելաշվիլիի հետ համատեղ մամուլի ասուլիսի ժամանակ հայտարարել է, որ Վրաստանը կատարել է իր ընտրությունը՝ որպես ԵՄ-ի հետ սերտ ասոցացված գործընկեր։
«Մեր երկկողմ հարաբերությունները ուժեղ են և գնալով ավելի են զարգանում։ Վրաստանը «Արևելյան գործընկերության» իրական առաջնորդն է։ Դա ոչ թե հաճոյախոսություն է, այլ փաստ։ Ասոցացման համաձայնագրի իրագործումը, որը մենք սկսել ենք նախորդ սեպտեմբերին, կարևորագույն դեր կխաղա մեր գործընկերության խորացման հարցում։ Այն, որ ես գտնվում եմ Վրաստանում, ցույց է տալիս, որ ձեր երկիրը շատ կարևոր է մեզ համար»,- ասել է Տուսկը։
Նա ընդգծել է, որ ԵՄ-ն շարունակելու է պաշտպանել Վրաստանի ինքնիշխանությունն ու տարածքային ամբողջականությունը։ Տուսկը դատապարտել է Վրաստանի ու Հարավային Օսիայի վարչական սահմանի փոփոխությունները։
