Կալիֆոռնիա նահանգի հանրապետական կուսակցության նահանգային խորհրդի անդամներից մեկն իր կուսակիցներին ուղարկել է մի նկար, որտեղ նախագահ Օբամային պատկերել է շիմպազեների ընտանիքում: Իրենց կուսակցի գործողությունը հարուցել է Կալիֆոռնիայի հանրապետականների զայրույթը։ Այս մասին գրում է The Los Angeles Times-ը:
Մերիլին Դևենպորտը, որը այդ «հանցանքի» հեղինակն է, երեխա կապկի գլխի փոխարեն դրել է Օբամայի նկարը, իսկ տակը գրել. «Հիմա դուք հասկանում եք, թե ինչու նա չունի ծննդյան վկայական»` ակնարկելով այն բանավեճը, որ կա ամերիկյան հասարակությունում, համաձայն որի՝ Օբամայի ծննդյան վկայականը կեղծ է, քանի որ նա ԱՄՆ-ում չի ծնվել:
Դևենպորտի նամակի մասին հայտնի է դարձել մամուլին, ինչն էլ առաջացրել է բուռն քննարկումներ: Շատերը Դևենպորտին մեղադրել են ռասիզմի և առաջին սևամորթ նախագահի հանդեպ անհարգալից վերաբերմունքի մեջ: Դևենպորտն իր մեղքը չի ընդունում` ասելով, որ դա ընդամենը կատակ էր:
Լուսանկարը՝ http://www.lenta.ru/news/2011/04/18/chimp/
