Էլեկտրոնիկայի ամերիկյան արտադրող Apple-ը հավաքում է սմարթֆոնների համաշխարհային վաճառքի գրեթե ողջ շահույթը, ինչի մասին հայտնում են Canaccord Genuity-ի վերլուծաբանները։ Ամեն ինչ գալիս է ընկերության արտադրանքի արժեքից։
The Wall Street Journal-ը՝ հղում անելով Canaccord Genuity-ի գործադիր տնօրեն Մայք Ուոլքլիին, հայտնում է, որ ընթացիկ տարվա առաջին եռամսյակում Թիմ Կուկի ընկերությունը ստացել է սմարթֆոնների համաշխարհային շուկայի օպերացիոն շահույթի 92 տոկոսը։ Անցած տարի ցուցանիշը կազմել է 65 տոկոս։
Apple-ի հիմնական մրցակցի՝ հարավկորեական Samsung-ի մասնաբաժինը կազմում է 15 տոկոս։ Ստացվում է, որ երկու ընկերությունները միասին վերահսկում են ոլորտի շահույթի 107 տոկոսը։ Դա վկայում է այն մասին, որ շուկայի մյուս արտադրողները կամ աշխատում են վնասով, կամ նրանց հազիվ է հաջողվում «դուրս գալ 0-ի»։
Աշխարհում գործում են սմարթֆոնների ավելի քան 1000 արտադրողներ։
