Ռուսական RIA Novosti լրատվական գործակալության փոխանցմամբ՝ «Լրագրողներ առանց սահմանների» կազմակերպության ավստրիական բաժանմունքը «Վեցյակի» հետ համաձայնագրի ձեռքբերումից հետո Իրանից պահանջել է ազատ արձակել բոլոր կալանավորված լրագրողներին։
Կազմակերպության տարածած հայտարարության մեջ նշված է, որ «Վեցյակի» ու Իրանի միջև համաձայնագրի ձեռքբերումը չեղյալ չի հայտարարում այն փաստը, որ 2013 թվականին Իրանի նախագահի պաշտոնում Հասան Ռուհանիի ընտրվելուց հետո ուժեղացել են անկախ լրագրողների ու բլոգերների հետապնդումները. «Արևմտյան քաղաքական գործիչները չպետք է թույլ տան, որ միջազգային բանակցություններում Իրանի կառավարության ձևավորած կերպարը կուրացնի իրենց։ Իրանը շարունակում է մնալ ռեպրեսիվ ռեժիմով պետություն, ուր անտեսում են ազատ արտահայտվելն ու ազատ մամուլը և դաժանորեն ճնշում են այլակարծներին»։
Վերջին երկու տարում Իրանում կալանավորվել է մոտ 100 բլոգեր ու ինտերնետային ակտիվիստ։ Իրանում կալանքի տակ է 15 լրագրող։
