Առողջապահության համաշխարհային կազմակերպությունը (ԱՀԿ) 1988-ին մայիսի 31-ը հայտարարել է Առանց ծխախոտի համաշխարհային օր՝ գրում է Calend-ը: Ամեն տարի ԱՀԿ-ն և նրա գործընկերները համատեղ նշում են այդ օրը՝ ուշադրություն հրավիրելով այն հանգամանքին, որ ծխելը վտանգավոր է առողջության համար:
Համաշխարհային հանրության առջև խնդիր էր դրված՝ հասնել այն բանին, որ 21-րդ դարում ծխելու խնդիրն իսպառ վերանա: Սակայն 21-րդ դարն է արդեն, իսկ խնդիրը չի վերացել՝ նիկոտինի դեմ պայքարը շարունակվում է: Ուստի այս օրվա գլխավոր նպատակն է ոչ միայն ապագա և ներկա սերունդներին առողջության համար ծխելու կործանարար հետևանքներից պաշտպանելը, այլև սոցիալական և բնապահպանական աղետների դիմակայումը՝ կապված ծխախոտի օգտագործման և դրա ծխի ներգործության հետ: