Շարմազանովի գլխավորած պատվիրակության հանդիպումները Ճապոնիայում
Աշխատանքային այցով Տոկիոյում գտնվող ՀՀ ԱԺ փոխնախագահ Էդուարդ Շարմազանովի գլխավորած պատվիրակությունը մայիսի 26-ին հանդիպում է ունեցել Ճապոնիա-Հայաստան խորհրդարանական բարեկամության լիգայի անդամների հետ: Հանդիպմանը քննարկվել են հայ-ճապոնական միջխորհրդարանական հարաբերություններին առնչվող հարցեր, կարևորվել է փոխայցերի անհրաժեշտությունը` երկխոսության ակտիվացման և երկկողմ հետաքրքրություն ներկայացնող ծրագրերի նախագծման համար:
ԱԺ փոխնախագահ Էդուարդ Շարմազանովը Ճապոնիա-Հայաստան խորհրդարանական բարեկամության լիգայի ղեկավար Սեյշիրո էտոյին, բարեկամության լիգայի ղեկավարի տեղակալ Տակեակի Մացումոտոյին և խմբի անդամ, Ճապոնիայի Արտաքին գործերի պետական նախարար Մինորու Կիուչիին պարգևատրել է ՀՀ ԱԺ նախագահի հուշամեդալներով` հայ-ճապոնական կապերի ամրապնդմանն ու խորացմանը նպաստելու համար:
Նույն օրը հայկական պատվիրակությունը հանդիպում է ունեցել նաև Ճապոնիայի Արտաքին գործերի նախարարության Կովկասի հարցերով հատուկ ներկայացուցիչ, դեսպան Ակիրա Մուտոյի հետ: Զրուցակիցներն անդրադարձել են Հայաստանի և Ճապոնիայի ներքաղաքական զարգացումներին, երկկողմ առևտրատնտեսական կապերի ընդլայնման հեռանկարներին, միջազգային կազմակերպություններում համագործակցության սերտացմանն առնչվող հարցերի: Կողմերը մտքեր են փոխանակել նաև տարածաշրջանային և միջազգային խնդիրների շուրջ:
Դեսպան Ակիրա Մուտոյի խնդրանքով հայկական կողմն անդրադարձել է հայ-թուրքական հարաբերություններին և ԼՂ հակամարտությանը: Հայկական պատվիրակության ղեկավարը դատապարտելի է համարել Թուրքիայի կողմից Հայաստանի ապօրինի շրջափակումը՝ ընդգծելով, որ Թուրքիան հայ-թուրքական սահմանի բացումն անիրավացիորեն շաղկապում է ԼՂ հակամարտության կարգավորման հետ: Նա նշել է, հիմնախնդիրը պետք է կարգավորվի բացառապես ԵԱՀԿ Մինսկի խմբի ձևաչափով՝ երեք հայտնի սկզբունքների հիման վրա, և Թուրքիան այնտեղ որևէ անելիք չունի: ԱԺ փոխնախագահն անթույլատրելի է որակել Ադրբեջանի գործողությունները՝ նշելով, որ դրանք չեն համապատասխանում բանակցային գործընթացի ընդհանուր ոգուն, հակասում են ԵԱՀԿ Մինսկի խմբի համանախագահների հայտարարություններին և առաջարկություններին:
Հիշեցնենք, որ պատվիրակության կազմում են Հայաստան-Ճապոնիա պատգամավորական բարեկամության խմբի ղեկավար Սամվել Ֆարմանյանը և խմբի անդամ Ալեքսանդր Արզումանյանը: Խորհրդարանական պատվիրակությանն ուղեկցել է Ճապոնիայում ՀՀ արտակարգ և լիազոր դեսպան Հրանտ Պողոսյանը:
