«Մենք աշխատում ենք մի օրենքի նախագծի վրա, որը դեմ է ցեղասպանությունների ժխտմանը»,- այսօր «Առաջին լրատվական»-ի հետ զրույցում ասաց ֆրանսիացի քաղաքական գործիչ, աջակողմյան կուսակցության անդամ Պատրիկ Դևեջյանը՝ անդրադառնալով Ֆրանսիայի խորհրդի կողմից Ցեղասպանությունը ժխտող օրինագծի ճակատագրին:
Հիշեցնենք, որ Ֆրանսիայում մի քանի անգամ փորձ է արվել նման օրենք ընդունել, օրինագիծը ներկայացվել է, բայց վերջնականապես չի ընդունվել: Այժմ այդ երկրում կրկին նման նախագիծ է պատրաստվում: «Հուսով եմ, որ այն այս անգամ կընդունվի»,- ասաց Պ.Դևեջյանը:
Վերջինս նաև ավելացրեց, թե այդ նախագծով իրենք պայքարում են ոչ միայն ցեղասպանության ժխտման, այլ ընդհանրապես, ազատությունների և իրավունքների սահմանափակման դեմ, ինչը նույնպես համարվում է հանցագործություն: «Պետք է հասկանալի լինի, որ մեկի ազատ խոսելու, մտածելու կամ արտահայտվելու կարողությունները սահմանափակելը նունպես դատապարտելի է: Մի պետություն, որը նման ոճիր է կազմակերպում մեկ այլ պետության նկատմամբ, չպետք է մնա առանց պատժվելու: Եթե հիմա չկարողանանք պայքարել այս հանցագործության դեմ, շատ հնարավոր է, որ այն կկրկնվի, թեկուզ այլ երկրում և այլ ժամանակահատվածում»,- ասաց նա:
Իսկ հարցին, թե ինչու է ուշանում այդ օրինագծի քննարկումը, Պ.Դևեջյանը պատասխանեց, որ այս պահին իրենք սպասում են օրենքի մշակման վերաբերյալ Եվրոպական խորհրդի մարդու իրավունքների հանձնաժողովի արձագանքներին:
