Թուրքիայի վարչապետ Ահմեթ Դավութօլղուի՝ այժմ պաշտոնապես նախկին խորհրդական Էթիեն Մահչուփյանը թուրքական «Աքշամ» պարբերականի իր սյունակում անդրադարձել է իր հեռացման մասին լուրերին, ապա նաև հայտարարել, որ «եթե ինքն էլ լիներ Թուրքիայի ղեկավարը, չէր ճանաչի Հայոց ցեղասպանությունը»:
«Մի օր մի գլխավոր խորհրդական կար» վերտառությամբ հոդվածում Մահչուփյանը նշում է, թե աշխատանքը թողնելու վրա կարող է ազդած լինել Ցեղասպանության հարցի վերաբերյալ իր վերջին բարձրաձայնումները, ինչպես նաև հավելել է, որ դեռ կարող է շարունակել աշխատանքը վարչապետի գլխավոր խորհրդականի պաշտոնում, սակայն ոչ պաշտոնական հիմունքներով:
Նա նշել է, որ անցյալ տարի մեծ ուրախությամբ է ընդունել վարչապետի գլխավոր խորհրդական դառնալու առաջարկը, քանի որ երկար տարիներ քաղաքական հարցերին անդրադարձող մտավորական լինելով՝ ցանկացել է իր մտքերն ու գաղափարները պաշտոնական կերպով ձևակերպել:
Մահչուփյան հավելել է, որ «Արդարություն և զարգացում» կուսակցության կառավարման տարիների ընթացքում կարևորել է իսլամի նկատմամբ զգայական քաղաքական ուժերին աջակցությունը՝ համարելով, որ կարելի է Թուրքիայում ժողովրդավարության հասնել իսլամական հատվածում ժողովրդավարության ավելի բարձր մակարդակ ապահովելու միջոցով:
Այնուհետև նա խոսել է աշխատանքից հեռանալու տեղեկությունների մասին՝ կրկին շեշտելով, որ մարտի 9-ին լրացել է իր 65 ամյակը, իսկ թուրքական օրենքներով այդ տարիքից թոշակի են անցնում, ինչի արդյունքում էլ նա անցել է թոշակի, ավտոմատ կերպով լքելով իր պաշտոնը, սակայն նրա հետագան դեռ վերջնականապես հստակեցված չէ:
«Միգուցե և վերջնական որոշման վրա ազդել է նաև ցեղասպանություն բառեզրը կիրառելու համար ԱԶԿ-ից իմ հասցեին հնչած քննադատությունը»,-աշխատանքը պաշտոնապես լքելու մասին գրել է Մահչուփյանը և հավելել, որ իր աշխատանքը շարունակելու որոշումն այժմ կախված է Թուրքիայի վարչապետից:
Վերջինս իր հոդվածում նաև բավական աղմկահարույց հայտարարություն է արել՝ նշելով, որ «եթե ինքն էլ լիներ Թուրքիայի վարչապետը, ապա չէր ճանաչի Հայոց ցեղասպանությունը», քանի որ «մեր օրերում վարչապետը պետք է պատասխանատու լինի իր ժողովրդի ներկայիս բարօրության և շահի համար ու չտանի հասարակությանն անհայտության թունելով»:
Հիշեցնենք, որ օրեր առաջ թուրքական «Հյուրիյեթ» պարբերականի հետ զրույցում Մահչուփյանը նշել էր, որ դեռ մարտի 9-ին նրա զբաղեցրած պաշտոնի հետ կապված փոփոխություններ են եղել, որոնք ավտոմատ էին և վաղուց էին նախատեսված երկրի օրենքներով: Հարցն այն է, որ Մահչուփյանի տարիքի հետ կապված փոխվել են աշխատանքի պայմանները, նա անցել է թոշակի, ինչի արդյունքում էլ ավտոմատ կերպով լքել է զբաղեցրած պաշտոնը: Նա հավելել է, որ շարունակելու է զբաղեցնել վարչապետի խորհրդականի պաշտոնը նոր կարգավիճակով և նոր պայմաններով, ինչի հետևանքով նա այլևս պետության կողմից աշխատավարձ չի ստանալու:
Ավելի ուշ տված հարցազրույցներից մեկում նա նշել է, որ մինչ վարչապետի խորհրդականի պաշտոնը զբաղեցնելն էլ ինքը մշտապես հրապարակայնորեն հայտարարել է, որ 1915-ին կատարվածը ցեղասպանություն է:
«Խորհրդականի պաշտոնում ևս դիրքորոշումս չեմ փոխել, ուստի անսպասելի ոչինչ չի եղել: Ասում եմ այն, ինչ նախկինում էլ ասել եմ»,- նշել է Մահչուփյանը:
Ավելի վաղ թուրքական աղբյուրները գրում էին, թե Թուրքիայի իշխող «Արդարություն և զարգացում» կուսակցությունը Մահչուփյանի հեռացնելու պատճառաբանությունը կապել է վերջինիս՝ պաշտոնի հետ տարիքի անհամապատասխանությամբ, թեև իրական պատճառը նրա՝ Հայոց ցեղասպանության մասին հայտարարությունն է, ինչի պատճառով վերջին շրջանում նրա հասցեին խիստ քննադատություններ էին հնչեցնում ԱԶԿ-ի տարբեր ներկայացուցիչներ։
Նշենք, որ Էթիեն Մահչուփյանն ուշագրավ հայտարարություններով մեկնաբանել էր Հռոմի պապ Ֆրանցիսկոսի մատուցած պատարագը, որի ժամանակ վերջինս 20-րդ դարի սկզբում թուրքերի կողմից հայերի զանգվածային կոտորածն անվանել էր իր անունով՝ Հայոց ցեղասպանություն: Մահչուփյանն ասել էր, որ «եթե հարցին տեխնիկական տեսանկյունից մոտենանք, մեր օրերում արդեն անհնար է ասել, որ 1915-ին ցեղասպանություն չի եղել»: Այս հայտարարությունից հետո թուրքական իշխանությունները խստորեն քննադատել էին Մահչուփյանին:
