Թուրքիայի վճռաբեկ դատարանը բանտում գտնվող պոլսահայ հայտնի գրող, լեզվաբան և գործարար Սևան Նշանյանի նկատմամբ սահմանված պատժաչափն ավելացրել է ևս 4 տարի 7 ամսով։ Այսպես, վերջինիս ազատազրկման ընդհանուր ժամկետը կազմեց 11 տարի 1 ամիս։ Այս մասին հայտնում է Թուրքիայում լույս տեսնող հայկական «Ակօս» շաբաթաթերթը։
Այս պահին վճռաբեկ դատարանը դեռ որոշում չի կայացրել Նշանյանի փաստաբանների՝ մարտ ամսին ներկայացրած հայցադիմումի վերաբերյալ, որով առաջարկվում է Նշանյանին մեղավոր ճանաչել ոչ թե «շղթայական հանցագործության», այլ միանման հանցանքի շրջանակներում, ինչը թույլ կտա հետագայում պայքարել՝ կրճատելու գործարարի համար սահմանված պատժաչափը։
Նշենք, որ Սևան Նշանյանը 2013 թվականին երկու տարվա ազատազրկման էր դատապարտվել Իզմիր նահանգում կիսավեր թուրքաբնակ գյուղը վերակառուցելու և այն զբոսաշրջային խոշոր կենտրոնի վերածելու համար։ Թուրքական իշխանություններն իր քննադատական հայտարարություններով հայտնի Նշանյանի աշխատանքը համարել էին «ապօրինի շինարարություն» և քրեական պատասխանատվության ենթարկել։ Սակայն հետագայում նրա պատժաչափը մի քանի անգամ ավելացվել էր։ Հայ գործարարի փաստաբանները դատարանի սույն որոշումները բողոքարկել են հնարավոր բոլոր ատյաններում, սակայն ամեն անգամ դիմումը մերժվել է։
