Ապրիլի 8-ի հանրահավաքում ամփոփելով ելույթը՝ ՀՀ առաջին նախագահ Լևոն Տեր-Պետրոսյանը հայտարարեց, որ մինչև հաջորդ հանրահավաքը, որը կկայանա ապրիլի 28-ին, Կոնգրեսը ակնկալում է, որ կկատարվեն «հանուն երկխոսության» իրենց կողմից առաջ քաշված երեք նվազագույն պահանջները, որոնք են՝ «քաղբանտարկյալների ազատ արձակումը, Ազատության հրապարակում հանրահավաքներ անցկացնելու իրավունքի վերականգնումը և մարտի 1-ի սպանությունները բացահայտելու պաշտոնական հավաստիացումը»:
«Եթե դա տեղի չունենա, ապա Հայ ազգային կոնգրեսը, սպառված համարելով երկխոսության հնարավորությունը, հարկադրված է լինելու կտրուկ փոխել իր մարտավարությունն ու գործողությունների բնույթը։ Մենք դեռևս հակված չենք իշխանության հետ վերջնագրի լեզվով խոսելու, բայց ժողովրդի համբերությունն էլ չափ ու սահման ունի։ Ապրիլի 28-ը պետք է դառնա կա՛մ երկխոսության սկզբնավորման, կա՛մ էլ՝ իշխանության ու հասարակության վերջնական ջրբաժանի օր»:
«Առաջին լրատվականը» ՀՀՇ վարչության անդամ Հարություն Ուռուտյանին հարցրեց` եթե պահանջները չկատարվեն, որո՞նք պետք է լինեն Կոնգրեսի անելիքները: «Կոնգրեսը կոնկրետ քայլեր կկատարի, և կպահանջենք իշխանությունների հրաժարականը», նշեց նա` իշխանություններին կոչ անելով հրաժարական տալ. «Մենք այսօր ունենք ոչ լեգիտիմ իշխանություն, այդ իսկ պատճառով մենք պահանջում ենք սահմանադրական ճանապարհով ընտրություններ»:
Իսկ հարցին, թե ինչո՞ւ իշխանությունները չեն գնում այդ պահանջների կատարման, չէ՞ որ դա նաև իրենց վարկանիշը կարող է բարձրացնել, Հարություն Ուռուտյանը պատասխանեց.
«Կոնգրեսը իրենից մեծ ուժ է ներկայացնում, Սասունի, Նիկոլի, Սամսոնի, Արամի, Շմավոնի նման տղաները և մյուս` ազատ արձակվածներս, ուժ ենք ներկայացնում, դրա համար էլ վախենում են քաղբանտարկյալներին ազատ արձակել, նրանք մտավախություն ունեն, որ նրանց ազատ արձակմամբ իշխանափոխությունը կարագանա»:
