ՀՀ ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արտակ Դավթյանը և արտաքին հարաբերությունների մշտական հանձնաժողովի նախագահ Արտակ Զաքարյանը փետրվարի 13-ին հանդիպում են ունեցել եվրասիական ինտեգրման հարցերով Ռուսաստանի Դաշնության Սվերդլովսկի մարզի Եկատերինբուրգ քաղաքից ժամանած պատվիրակության հետ, որին ուղեկցում էր Եվրասիական համագործակցության հիմնադրամի նախագահ Մհեր Սիմոնյանը:
Պատվիրակության ղեկավար, Ուրալի պետական տնտեսագիտական համալսարանի ռեկտոր Միխայիլ Ֆյոդորովը նշեց, որ եվրասիական ինտեգրման գործընթացներում մեծապես կարևորվում է երիտասարդների մասնակցությունը և հատկապես այդ տեսանկյունից արժևորեց համագործակցությունը Հայ-ռուսական (սլավոնական) համալսարանի հետ:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ Եվրասիական համագործակցության հեռանկարներին անդրադառնալով՝ հյուրերը մատնանշել են այն հնարավորությունները, որ տարածաշրջանային համագործակցության զարգացմամբ կստեղծեն և կիրացնեն ԱՊՀ երկրները՝ շնորհիվ ընդհանուր շահերի ու նպատակների: Նրանք ներկայացրին նաև արդեն իսկ հաջողությամբ իրագործված ծրագրեր ԱՊՀ անդամ որոշ երկրների մասնակցությամբ: ՌԴ-ում եվրասիական ինտեգրման գաղափարի նպատակով իրականացվող տարբեր ծրագրերի մասին խոսեցին պատվիրակության անդամ, Նովոուրալսկ քաղաքային օկրուգի ղեկավար Վլադիմիր Մաշկովը և Եվրասիական ինտեգրման զարգացման հիմնադրամի նախագահ Սերգեյ Պորխաչյովը:
Մհեր Սիմոնյանը տեղեկացրել է, որ պատվիրակությունը կլոր սեղանի է մասնակցելու Հայ-ռուսական (սլավոնական) համալսարանում, որի ընթացքում կքննարկվեն մի քանի ծրագրեր:
Ողջունելով պատվիրակության այցը խորհրդարան՝ Արտակ Դավթյանը նշեց, որ Հայաստանում պարբերաբար քննարկվում է եվրասիական ինտեգրման հարցը. այն գտնվում է քաղաքական ուժերի ուշադրության կենտրոնում:
ԱԺ արտաքին հարաբերությունների մշտական հանձնաժողովի նախագահը նկատեց, որ եթե եվրասիական ինտեգրման գաղափարը Հայաստանում դեռևս որպես նորույթ է ընկալվում, ապա Ռուսաստանի Դաշնության հետ մեր բարեկամական կապերն ունեն ոչ միայն երկար տարիների պատմություն, այլև ռազմավարական նշանակություն: Կարևորվեցին տնտեսական համագործակցության ծրագրերը, ընդգծվեց, որ Հայաստանում միշտ ողջունվել են տնտեսական ինտեգրմանն ուղղված քայլերը: Արտակ Զաքարյանի խոսքով՝ Հարավային Կովկասում առկա իրավիճակում պետք է երկկողմ ու բազմակողմ, բազմավեկտոր համագործակցության միջոցով կարողանալ լուծումներ գտնել ապագայի կայուն և խաղաղ զարգացման համար: Մյուս կողմից՝ ժամանակակից աշխարհը լի է տարբեր մարտահրավերներով, որոնք միայնակ հաղթահարել հնարավոր չէ, ուստի ինտեգրման բոլոր ուղիները կարևոր նշանակություն են ստանում:
Նրա կարծիքով՝ եվրասիական ինտերգրման շուրջ համագործակցությունը Հայաստանին ավելի լայն հնարավորություններ կարող է տալ Ռուսաստանի Դաշնության հետ առկա ռազմավարական հարաբերությունները զարգացնելու և հատկապես տնտեսական կապերի ուժեղացման տեսանկյունից:
ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահն իր խոսքում կարևորեց եվրասիական համագործակցությունը՝ որպես ընդհանուր խնդիրների լուծման հարթակ: Արտակ Դավթյանը համոզմունք է հայտնել, որ նմանատիպ այցերը, քննարկումները մեծապես կնպաստեն գործընթացի արդյունավետությանը:
Հայ խորհրդարանականները շնորհակալություն հայտնեցին հյուրերին՝ բարձրացված մի շարք հարցերին հանգամանալից պատասխանելու համար:
