Հարյուրավոր քրիստոնյաներ բողոքի ակցիայի են դուրս եկել պակիստանյան Լահորում 2 կաթոլիկ տաճարների վրա թալիբների հարձակումից հետո: Այս մասին հայտնում է DAWN պարբերականը:
Կիրակի երկու պայթյուն է որոտացել Լահորի հարավային Յուհանաբադ շրջանում, որտեղ հիմնականում քրիստոնյաներ են բնակվում` կաթոլիկ մատուռների մոտ: Նախնական տեղեկությամբ՝ պայթուցիկները գործարկել են մահապարտները, պատասխանատվությունը ստանձնել է «Թեհրիք է Թալիբան Պակիստան» արմատական խմբավորման ստորաբաժանումը: Վերջին տվյալներով՝ ահաբեկչությանը զոհ է գնացել 15 մարդ, տուժել է 70 մարդ:
Ցուցարարները փակել են Լահոր, Ֆայզալաբադ, Սարգոդհա և Գուջրանվալա քաղաքների ճանապարհները: Ոստիկանության տվյալներով՝ ակցիայի մասնակիցներն արգելափակել են ահաբեկչությունների վայրից ոչ հեռու անցնող մայրուղին: Այսպես` մոտ 100 մարդ հավաքվել է Ֆայզալաբադի ճանապարհներից մեկին, որտեղ անիվներ են այրել և հարձակվել մեքենաների վրա: Եվս 200 մարդ բողոքել է Լահորի տարբեր շրջաններում, այդ թվում՝ Յուհանաբադում, որտեղ կանայք նստացույց են կազմակերպել տեղի հոգևորականի գլխավորությամբ:
Տեղի իշխանությունները երկուշաբթի հրահանգել են փակել բոլոր քրիստոնեական դպրոցները` զոհերի թաղման հետ կապված: Քրիստոնեական համայնքի ղեկավար Քամրան Մայքլը բողոքողներին խաղաղության կոչ է արել:
