Ռուս ընդդիմադիր գործիչ Բորիս Նեմցովի աղմկահարույց սպանությունը ցնցել է հասարակությանը: ԶԼՄ-ների բազմաթիվ ենթադրություններ, պաշտոնական տվյալներ, ցավակցություններ, հիշատակի բազմամարդ ակցիա՝ այս հանգստյան օրերին քաղաքական գործչի մասին շատ էին գրում ու խոսում:
Մամուլում հիմնականում արծարծվում էր այն միտքը, թե Նեմցովի հետ հնարավոր էր չհամաձայնել, սակայն չնկատել անհնար էր:
Ընդ որում՝ անգամ նման ողբերգական իրավիճակում բազմաթիվ մեկնաբանություններ ու եզրակացություններ Բորիս Նեմցովի մտերիմների ու հարազատների համար հնչում են ծայրահեղ հիվանդագին:
Հասարակական ու քաղաքական գործիչ, փայլուն հռետոր Նեմցովը առաջին հերթին եղել է վառ անհատականություն ու սիրող հայր:
SPLETNIK.RU-ի թղթակիցը կապվել է Եկատերինա Օդինցովայի՝ Բերիս Նեմցովի երկու երեխաների մոր հետ՝ խնդրելով մի քանի բառ ասել նրա մասին:
«Ես ոչինչ չեմ պատմի անցյալի մասին, քանի որ դա հիմա արդեն անտեղի է: Նախկինում երբեմն ինձ չէր հաջողվում զսպել զգացումներս կանացի վիրավորանքի պատճառով, ու ես կարող էի ինձ թույլ տալ ավելին, ու հիմա ես դրա համար զղջում եմ: Ես նրան շատ էի սիրում, նա լուսավոր մարդ էր, մենք հիանալի երեխաներ ունենք, ու ես նրա մասին կհիշեմ միայն լավը: Բարեբախտաբար, նրա մահից 5 օր առաջ՝ Ներման կիրակիին, ես նրան գրեցի, որ ամեն ինչի համար նրան ներել եմ ու խնդրում եմ ներել ինձ: Կարծես զգում էի»,- ասել է նա:
«Մենք մեծ վշտի մեջ ենք, երեխաները մնացել են անհայր: Որդիս 19 տարեկան է, նա ուսանող է՝ ֆիզիկոս, ու շատ նման է հորը: Աղջիկս 12 տարեկան է, նա աստվածացնում էր հորը: Նա հիանալի հայր էր, սիրող ու արդարացի: Ես հիմա պետք է կրկնակի ուժեղ լինեմ՝ մոր և հոր փոխարեն»:
«Եթե ես իմանայի, որ նա կմահանար, վաղուց նրան ամեն ինչ կներեի: Եթե ես կարողանայի, կյանքիս կեսը կտայի, միայն թե նա ողջ մնար»,- ասել է Օդինցովան:
