Պոլսո հայոց պատրիարքի փոխանորդ Արամ արքեպիսկոպոս Աթեշյանը Ցեղասպանության 100-րդ տարելիցին Հայաստան չի ժամանելու: Այդ մասին «Առաջին լրատվական»-ի հետ զրույցում ասաց Արամ արքեպիսկոպոս Աթեշյանը՝ հավելելով. «Այդ օրը պատարագ պիտի մատուցանեմ»:
Հարցին՝ հնարավո՞ր է սրբազանը մասնակցելու է Գալիպոլիի (Չանաքքալե) հաղթանակի 100¬-րդ տարեդարձին, որին մասնակցելու համար Թուրքիա էր հրավիրվել նաև Սերժ Սարգսյանը, սրբազանը նշեց. «Ներողություն, բայց ոչ մեկ նյութի մասին գաղափար հայտնել չեմ ուզի ես»:
Հիշեցնենք, որ նախորդ տարի ապրիլի 24-ին ընդառաջ՝ Թուրքիայի վարչապետ Ռեջեփ Թայիփ Էրդողանը հանդես եկավ ուղերձով՝ նշելով, որ 1915 թվականի դեպքերը մեր բոլորի ընդհանուր ցավն են: Նա նաև 20-րդ դարասկզբի իրադարձությունների հետևանքով կյանքից զրկված հայերի թոռներին ցավակցություն հայտնեց։
Պոլսո հայոց պատրիարքի փոխանորդ Արամ արքեպիսկոպոս Աթեշյանը նշել էր, որ դրական է գնահատում Էրդողանի ուղերձը, որով նախևառաջ՝ պարզապես հայ ժողովրդի ցավն էր կիսում և ձիթենու ճյուղ մեկնում, որպեսզի լուծվեն այս հարցերը: Նա նաև նշել էր, որ վարչապետն առաջին անգամ է, որ նման ցավակցություն է հայտնում, կիսում մեր ցավերը, և քանի որ առաջին անգամ է նման քայլ արվում, ուրեմն մենք էլ ըստ այդմ վարվենք և մոտենանք, ինչպես բոլոր երկրները, որոնք գնահատանքով ընդունեցին վարչապետի այս քայլը:
