Երևանի քաղաքապետարանում հրավիրված աշխատանքային ամենշաբաթյա խորհրդակցության ժամանակ համայնքային բյուջեի սեփական եկամուտների հավաքագրման գործընթացի հետ կապված՝ եկամուտների հաշվառման և գանձման վարչության պետը զեկուցել է, որ քաղաքապետարանի և վարչական շրջանների 2015 թվականի առաջին ամսվա կատարողականի ընդհանուր ցուցանիշը կազմել է 113 տոկոս: Քաղաքապետ Տարոն Մարգարյանը հանձնարարել է շարունակել աշխատանքները նույն սկզբունքով՝ պահպանելով 100 և ավելի տոկոս ցուցանիշը:
Տարվա ընթացքում վարչական շրջաններում ջրամատակարարման և ջրահեռացման համակարգերի բարելավման ուղղությամբ նախատեսված են մի շարք աշխատանքներ: Մասնավորապես զեկուցվել է, որ ֆրանսիական կառավարության կողմից տրամադրված վարկային միջոցներով կվերակառուցվի շուրջ 94 կմ ջրագիծ, 5.2 կմ կոյուղագիծ: Բացի այդ, գարնանից կմեկնարկեն «Աէրացիա» կեղտաջրերի մաքրման կայանի վերականգնման աշխատանքները:
Թափառող կենդանիների վնասազերծման ուղղությամբ տարվող աշխատանքների մասով զեկուցվել է, որ շահագրգիռ հասարակական կազմակերպությունների և Երևանի ավագանու անդամների հետ տեղի ունեցած հանդիպում-քննարկման ընթացքում գործընթացի կազմակերպման վերաբերյալ կոնկրետ որևէ առաջարկ չի եղել, կազմակերպությունները հրաժարվել են նաև մրցույթին մասնակցությունից:
