Թուրքիան լրջորեն քննարկում է Շանհայի համագործակցության կազմակերպությանն (ՇՀԿ) անդամակցելու հարցը` որպես ԵՄ-ին այլընտրանք: Այս մասին Թուրքիայի վարչապետ Ռեջեփ Թայիփ Էրդողանը հայտարարել է Kanal 24 հեռուստաալիքին տված հարցազրույցում` հայտնում է Today’s Zaman-ը:
Էրդողանի խոսքով՝ ներկայումս Թուրքիան այլընտրանքային տարբերակներ է փնտրում, քանի որ ԵՄ-ին անդամակցելու իր բոլոր հույսերը ի չիք են դարձել` ԵՄ անդամ մի շարք երկրների դեմ լինելու պատճառով:
Թուրքիայի` ԵՄ-ին անդամակցելու բանակցություններն ընթանում են 2005-ից, բայց առայժմ այս հարցը բաց է մնում` հիմնականում այն պատճառով, որ ԵՄ անդամ մի շարք երկրներ, այդ թվում՝ Ֆրանսիան և Գերմանիան, բացահայտ կերպով դեմ են այդ երկրի անդամակցությանը ԵՄ-ին:
2012-ի հունիսի 7-ին Պեկինում` ՇՀԿ ամենամյա գագաթնաժողովի ժամանակ, Թուրքիան երկխոսության գործընկերոջ կարգավիճակ է ստացել:
ՇՀԿ-ն տարածաշրջանային միջազգային կազմակերպություն է, որը հիմնադրվել է 2001-ին: Անդամներն են՝ Ռուսաստանը, Չինաստանը, Ղազախստանը, Ղրղըզստանը, Տաջիկստանը և Ուզբեկստանը, կազմակերպությունում դիտորդի կարգավիճակ ունեն՝ Իրանը, Պակիստանը, Հնդկաստանը, Մոնղոլիան և Աֆղանստանը:
