ԱՄՆ ամենաերիտասարդ միլիարդատեր, Facebook սոցցանցի հիմնադիր Մարկ Ցուկերբերգը կզբաղվի Նյու Ջերսի նահանգի նահանգապետ Քրիս Քրիստիի նախընտրական քարոզարշավի ֆինանսավորմամբ` հաղորդում է BuzzFeed-ը:
Անձամբ Ցուկերբերգի խոսքով՝ ինքը նման որոշման է հանգել՝ ոգևորվելով կրթության ոլորտի բարեփոխումներով, որը Քրիսթին անցկացնում է իր նահանգում: Միլիարդատիրոջ խոսքով՝ ինքը հաճույքով կշարունակի համագործակցությունը՝ ուղղված այդ ոլորտին:
Քարոզարշավի շրջանակում միջոցներ հավաքելու համար Facebook-ի հիմնադիրը մտադիր է Կալիֆոռնիայում իր տանը բարեգործական ընթրիք կազմակերպել ու գոյացած միջոցներն ուղղել Քրիստիի նախընտրական շտաբին:
Քրիստիի և Ցուկերբերգի համագործակցությունը սկսվել է դեռ 2010թ., երբ նա 100 մլն դոլար նվիրաբերեց Նյու Ջերսիի կրթական համակարգի զարգացմանը: Դրա շնորհիվ նահանգապետը կարողացավ նահանգում անցկացնել մեծամասշտաբ բարեփոխումներ ու զգալիորեն բարձրացնել Նյու Ջերսիում կրթության մակարդակը:
