Այս երկուշաբթի կայացավ ԱՄՆ նախագահ Բարաք Օբամայի երդմնակալության արարողությունը, և նա պաշտոնապես ստանձնեց Սպիտակ տան ղեկավարման 2-րդ շրջանը: Այդ ընթացքում երկրագնդի մյուս հատվածում նրա եղբայրը` Մալիկ Օբաման ոգևորվելով իր հարազատի հաջողություններով որոշել է սկսել քաղաքական կարիերան և իր թեկնածությունն է առաջադրել Քենիայի ընտրություններում, որը կկայանա մարտին: 54-ամյա թեկնածուն հավակնում է Սիայայի շրջանի ղեկավարի պաշտոնին: Առաջադրվելու է որպես անկախ թեկնածու:
Մալիկ Օբաման հայտարարել է, որ իրենց երկրին էլ է Օբամա հարկավոր և դրա արդյունքում իրենց երկրներն առավել մոտ բարեկամներ կդառնան: Բարաք Օբամայի` ԱՄՆ նախագահ դառնալու փաստը բոլորի համար շատ հեռանկարներ բացեց: Նա նշել է, որ իր եղբորը հաջողվեց ճեղքել ամուր պատը: Եվ որ ոչ ոք չի կարող ասել, որ սևամորթներն ինչ-որ բան անել չեն կարող, քանի որ նրանք աֆրիկացի են: Նա ասել է, որ ցանկանում է իրենց կապերի զարգացում և որ մարդիկ տեսնեն Աֆրիկայում ևս հնարավոր է այնպիսի առաջընթաց գրանցել, ինչպիսին որ Ամերիկայում:
Մալիկ Օբամայի հնչեցրած մտքերը հիմնականում համապատասխանում են ժողովրդի կարծիքին, ովքեր դժգոհ են երկրի ղեկավարության կոռումպացվածությունից:
Նա խոստանում է ընտրվելու պարագայում աջակցել նոր ճանապարհների, հիվանդանոցների կառուցմանը, ջրամատակարարումն իրականացնելու համար խողովակաշարերի անցկացմանը, ինչպես նաև փոքր բիզնեսի զարգացմանը: Նա նաև նշել է, որ դեմ չէ 2017 թ-ին նախատեսված Քենիայի նախագահական ընտրություններում պայքարելուն:
