Փոլ Մաքքարթնին, Ռինգո Սթարը և ռոք երաժշտության այլ համաշխարհային աստղեր վշտացած են բրիտանացի երգիչ Ջո Կոկերի մահվան կապակցությամբ: Նա մահացել է երեկ՝ քաղցկեղից, 70 տարեկանում: Այս մասին գրում է TASS-ը:
Ջո Կոկերը, որը երգում էր ռոք, բլյուզ ու սոուլ ոճերում, ծնվել է Անգլիայի հյուսիսային Շեֆիլդ քաղաքում: 1968թ. Կոկերը զբաղեցրել էր բրիտանական չարտերի առաջին հորիզոնականը՝ կատարելով The Beatles խմբի With A Little Help From My Friends երգի քավեր տարբերակը:
Rolling Stone ամսագիրը երգչին դասել է 97-րդ հորիզոնականում՝ ժամանակակից երաժշտության պատմության 100 մեծագույն երաժիշտների ցուցակում:
«Շատ տխուր է լսել Ջոյի մահվան մասին: Նա լավ տղա էր Անգլիայի հյուսիսից, ես սիրում էի նրան, ինչպես շատ այլ մարդիկ: Ինձ դուր էր գալիս, թե ինչպես էր նա երգում»,- ասել է Փոլ Մաքքարթնին:
«Երկար տարիներ նա իմ լավ ընկերն էր, ես շատ տխրեցի, երբ իմացա, որ նա հիվանդացել է: Շատ տխուր է լսել, որ նա այլևս չկա: Նա այնքան շատ բան է տվել այս աշխարհին: Մենք նրա կարիքը շատ կզգանք»,- հավելել է Մաքքարթնին:
Իր ցավակցություններն է հայտնել նաև The Beatles-ի մեկ այլ նախկին անդամ՝ Ռինգո Սթարը. «Մնաս բարով, ու Աստված օրհնի քեզ, Ջո Կոկեր: Քո ընկերներից մեկից՝ խաղաղություն ու սեր քեզ»:
«Հանգչիր խաղաղությամբ, իմ բարի ընկեր, դու եղել ես ռոքի պատմության մեջ լավագույն երգիչներից մեկը»,- գրել է կանադացի ռոք-վոկալիստ Բրայան Ադամսը:
