«Վաշինգտոնը ցանկանում է տեսնել ժողովրդավար, բարեկեցիկ, խաղաղ և անվտանգ Հայաստան»,- այս մասին այսօր լրագրողների հետ հանդիպման ժամանակ ասաց իր դիվանագիտական առաքելությունը Երևանում ավարտող Հայաստանում ԱՄՆ դեսպան Ջոն Հեֆերնը՝ եզրափակելով Հայաստանում իր առաքելությունն ու արձանագրված արդյունքները:
Դեսպան Հեֆերնը հանդես եկավ իր վերջին հրապարակային և պաշտոնական ելույթով՝ Հայաստանում իր եռամյա դիվանագիտական աշխատանքից հետո: Նա տեղեկացրեց, որ ՀՀ-ում ԱՄՆ հաջորդ դեսպանը կլինի Ռիկ Միլզը, ում թեկնածությունը հաստատվեց այս շաբաթվա ընթացքում: Ըստ Հեֆերնի՝ հայտնի չէ, թե կոնկրետ երբ կժամանի նոր դեսպանը: Նրա ենթադրություններով՝ տոներից մի քանի շաբաթ անց այստեղ կլինի:
«Կարճ անցումային շրջան կլինի, թեև դեսպանատան աշխատանքները կշարունակվեն բնականոն հունով, դեսպանի պարտականությունները ժամանակավորապես կկատարի փոխդեսպան Բրայսը, դեսպանատան պաշտոնյաների թիմը մնում է, և աշխատանքները բնականոն կշարունակվեն: Ռիկն իր կնոջ հետ է գալու: «Թվիթերում» ասել եմ ու կասեմ, որ սա իմ լավագույն գործերից մեկն է եղել ամբողջ աշխարհում»,- ասաց դեսպանը՝ շարունակելով, որ ինքն ու իր կինը՝ Լիբին, շատ մեծ տպավորություններով են հեռանալու, թեև իր կինն այսօր իր հետ չէ Հայաստանում:
Նա ասաց, որ ինքն ու իր կինը հիանում են հայ ժողովրդի տաղանդով, ստեղծարարությամբ: «Տեսել ենք տարբեր միջոցառումներ, և ես փորձել եմ հնարավորինս շատ միջոցառումների ներկա լինել»,- ասաց դեսպանը:
Ջոն Հեֆերնի խոսքով՝ Վաշինգտոնի դեսպանատան աշխատանքի նպատակը հստակ է մնում՝ ցանկանում են տեսել ժողովրդավար, բարեկեցիկ, խաղաղ և անվտանգ Հայաստան, իսկ դրան հասնելու համար ցանկանում են Հայաստանին օգնել՝ անելով այն ամենը, ինչ կարող են:
