Անցած 2012 թվականն ընդգրկվել է սարքավորումներով ուսումնասիրությունների ավելի քան 130 տարվա ժամանակահատվածի ամենաշոգ տարիների տասնյակում և եղել է ամենաշոգը ԱՄՆ-ի ամբողջ տարածքի համար, բացառությամբ՝ Հավայիի և Ալյասկային։ Այս մասին ասված է NASA ամերիկյան տիեզերական գործակալության և ԱՄՆ-ի Օվկիանոսային մթնոլորտային հետազոտությունների ազգային վարչության (NOAA) համատեղ զեկույցում,- հայտնում է RIA Novosti-ն:
Մեթոդները, որ օգտագործում են տիեզերական հետազոտությունների Գոդդարդի անվան կենտրոնը (GISS) և NOAA-ն, առանձնապես չեն տարբերվում: NASA-ի տվյալներով՝ 2012-ը 9-րդն է 14.6 աստիճան Ցելսիուս միջին գլոբալ ջերմաստիճանով, NOAA-ն 2012-ը համարում է 10-րդը 14.5 աստիճան Ցելսիուսով:
NASA-ի տվյալներով՝ 1880-ից մոլորակի մակերևույթի միջին գլոբալ ջերմաստիճանը բարձրացել է 0.8 աստիճանով, մարդու գործունեության հետևանքով ածխաթթվային գազի խտությունը մթնոլոտում մեծացել է: Ամերիկացի օդերևութաբանների տվյալներով՝ վերջին 130 տարում գլոբալ միջին ջերմաստիճանը բարձրացել է 0.06 աստիճան Ցելսիուսով մեկ տասնամյակում, իսկ 1970-ից՝ գրեթե 3 անգամ ավելի արագ՝ 0.16 աստիճանով մեկ տասնամյակում:
Տեղումների քանակի առումով 2012-ը նորմային մոտ է եղել, բայց առանձին շրջաններում պայմաններն էքստրեմալ են եղել: Այսպես՝ անցյալ տարի երաշտից տուժել են Ռուսաստանը, Ուկրաինան և Ղազախստանը, հյուսիսամերիկյան մայրցամաքի կենտրոնական մասը, Բրազիլիայի հյուսիս-արևելքը, իսկ Աֆրիկայի արևմուտքում և կենտրոնական մասում, Մեծ Բրիտանիայում և Ֆինլանդիայում տեղումների քանակը գերազանցել է նորման:
NOAA-ն նաև նշում է, որ 2012-ի սեպտեմբերին թարմացվել են Արկտիկայում սառույցի ծածակույթի նվազագույն և Անտարկտիկայում՝ առավելագույնի ռեկորդները՝ համապատասխանաբար 3.41 և 19.44 մլն քառակուսի կմ:
