Լոնդոնի Claridge’s հնգաստղանի հյուրանոցի մոտ տեղի է ունեցել ակցիա՝ հասարակական վայրերում կրծքով կերակրելու օգտին, հաղորդում է Daily Mail-ը:
Ակցիան անցկացվել է մի միջադեպի պատճառով, որը տեղի է ունեցել հյուրանոցում դեկտեմբերի 2-ին, երբ ռեստորանի աշխատակիցներից մեկը խնդրել էր երեխային կրծքով կերակրող 35-ամյա Լուիզ Բերնսին ծածկվել անձեռոցիկով:
Անկախություն կուսակցության առաջնորդ Նայջել Ֆարաժը համարում է, որ կանայք «կարող էին դա անել անկյունում նստելով»:
«Ինձ թվում է, որ այնքան էլ դժվար չէ երեխային կերակրել՝ առանց այդ ամենն ի ցույց դնելու: Դա ուղղակի սթափ մտքի հարց է»,- ընդգծել է նա։
Դրա հետ մեկտեղ, Մեծ Բրիտանիայի վարչապետ Դևիդ Քեմերոնը աջակցել է երիտասարդ մայրերի անցկացրած ակցիան: Նա համարում է, որ կրծքով կերակրելը բացարձակ բնական երևույթ է և պետք չէ, որ կանայք դրա համար անհարմարություն զգան:
