Լոս Անջելեսի բնակիչ Ջորջ Փրիորը 1 ամիս օրական խմել է 10 տարա Coca-Cola՝ ստուգելու համար, թե դա ինչպես կազդի իր առողջության վրա: Այս մասին հայտնում է The Daily Mirror-ը: 50-ամյա տղամարդը նշել է, որ նրան հատկապես հետաքրքրում է ըմպելիքում պարունակվող շաքարի հավելյալ չափաբաժնի ազդեցությունն օրգանիզմի վրա:
Փորձի վերջին Փրիորը նշել է, որ իր քաշը 76 կիլոգրամից ավելացել է՝ դառնալով 86 կգ: Տղամարդու զարկերակային ճնշումը 129/77-ից բարձրացել է մինչև 145/96 մմ սնդիկի սյան: Նշվում է, որ այդպիսի ցուցանիշները նորմայից շատ ավելի բարձր են: Դրանց դեպքում լրջորեն մեծանում է սրտի հիվանդությունների և կաթվածի ռիսկը:
Փրիորը պատմել է, որ որոշ ժամանակ անց նրա մոտ ձևավորվել է ըմպելիքի նկատմամբ կայուն հակում: Բացի դրանից՝ տղամարդը սկսել է ցանկություն ունենալ «ինչ-որ քաղցր բան ուտելու», ինչը նախկինում չի նկատել: Միաժամանակ, ամերիկացին նշել է, որ 1 ամսվա ընթացքում սնվել է բացառապես ածխաջրերի ցածր պարունակությամբ ուտեստներով: Նրա սննդակարգում ներառվել են դիետիկ միս, բանջարեղեն և հատապտուղներ:
«Ես դիմեցի այդ փորձին, որպեսզի մարդկանց ստիպեմ մտածել և խոսել այն մասին, թե որքան շաքար են նրանք ուտում և որքան վտանգավոր է դա»,- պատմել է Փրիորը:
100 գրամ Coca-Cola-ն պարունակում է 10.2 գ շաքար: Ընկերությանը բազմիցս քննադատել են իր ըմպելիքների ավելորդ քաղցրության համար: Քննադատության ալիքի ներքո Coca-Cola-ն 2014թ. սկզբին թողարկել է Coca-Cola Life գազավորված ըմպելիք, որում շաքարի պարունակությունը մեկ երրորդով ցածր է:
