Ադրբեջանում կազմակերպված ցույցերը կապված են ադրբեջանական բանակում մահացած նորակոչիկ զինվորի հետ, սակայն հնչում են նաև տեսակետներ, թե դրանք կազմակերպված են իշխանության կողմից: Այսօր լրագրողների հետ հանդիպմանը այս մասին ասաց ադրբեջանագետ Սարգիս Ասատրյանը:
«Գուցե ինչ-որ կերպ ալիքի իմիտացիա են ստեղծում, թե Ադրբեջանում կա քաղաքացիական հասարակություն: Հատկանշական է նաև այն հանգամանքը, որ այն ոստիկանները, ովքեր ցրում են ցույցը, միմյանց հետ խոսում են քրդերեն, այսինքն` ադրբեջանցի չեն: Իսկ սա Ադրբեջանի Սահմանադրության կոպիտ խախտում է, այսինքն` ինչ-որ բան, այնուամենայնիվ, այն չէ»,- կարծում է ադրբեջանագետը:
Ասուլիսի մյուս բանախոսը՝ վրացագետ Ալիկ Էրոյանը, նշեց, որ այժմ Վրաստան-Ադրբեջան հարաբերությունները չունեն այն ջերմությունը, ինչը որ կար Սաակաշվիլու օրոք. «Այդուհանդերձ, Իվանիշվիլին մինչև Ադրբեջան կատարած այցը հայտարարում էր, թե Ախալքալաք-Կարս երկաթգիծը տնտեսապես ձեռնտու չէ Վրաստանին, իսկ այցից հետո իր կարծիքը փոխեց: Վրաստանի վարչապետը շատ հետաքրքիր մի մարտավարություն է որդեգրել. նա ասում է, թե ինքը քաղաքականության մեջ այնքան էլ փորձառու չէ, այդ պատճառով է հաճախակի վրիպում: Եվ այս հարցում էլ նա փաստորեն նույն բանն արեց:
Ինչ վերաբերում է Իվանիշվիլիի` Հայաստան նախատեսված այցելությանը, ապա կարծում եմ, որ տարբեր ոլորտներին առնչվող բազմաթիվ հարցեր կքննարկվեն: Նա հնարավորություն կունենա ավելի լավ պատկերացնել հայ-վրացական հարաբերությունները: Կարծում եմ, որ Վրաստանի ներկայիս իշխանությունը փորձում է Հայաստանի հետ հարաբերությունները բարելավել »:
