Ինչպես հաղորդում է ռուսական Ведомости թերթը, «Ֆոսագրո» քիմիական ընկերության ղեկավար, Սանկտ-Պետերբուրգի լեռնահանքային համալսարանի ռեկտոր Վլադիմիր Լիտվինենկոն մուլտիմիլիոնատեր է: Թերթը նշում է, որ 1994թ.ից Լիտվինենկոն գլխավորում է այդ համալսարանը, իսկ 1997թ. եղել այն խորհրդի նախագահը, որտեղ պաշտպանվել է վարչապետ Վլադիմիր Պուտինի թեկնածուական ատենախոսությունը:
2010թ.-ին Լիտվինենկոն գլխավորում է «Ֆոսագրոն», որն, ըստ մասնագետների, գնահատվել է մոտ $7-9 մլրդ դոլար: Սա նշանակում է, որ ընկերության 5% բաժնեմասը, որ պատկանում է Լիտվինենկոյին, կգնահատվի $350-450 մլն: Տեղեկություններ կան, որ անցած տարի Լիտիվինենկոն դիմել է վարչապետ Պուտինին` աջակցելու «Ֆոսագրոյի» կողմից կանադական Potash ընկերությունը գնելուն, սակայն այդ գործարքը չի պսակվել հաջողությամբ:
Մի քանի օր առաջ էլ The Washington Times-ը գրել էր, որ ըստ Վաշինգտոնի Բրուքինգսի համալսարանի մասնագետների` Պուտինի ատենախոսության մեծ մասը գրագողություն է:
Նրանք հատկապես առանձնացրել են ներածական մասը, որտեղ 20 էջից 16-ն արտագրվել են որոշ փոփոխություններով Ուիլյամ Քինգի և Դևիդ Քլիլանդի «Ռազմավարական ծրագրավորում և քաղաքականություն» հոդվածից:
Իսկ աշխատանքի մեծ մասը վերցված է Քինգի և Քլիլանդի` 1978թ.-ին տպագրված գրքից:
Ընդ որում, աշխատանքի 6 աղյուսակներ ամբողջությամբ համընկնում են վերնոշյալ գրքում տպագրվածների հետ:
