ԲՀԿ-ի գլխավորած ժողովրդական շարժումը Գագիկ Ծառուկյանի հանձնարարությամբ կառույցներ է ունենալու նաև Սփյուռքում: Սա ըստ էության կարելի է համարել այս շարժման դեսպանատներ Սփյուռքում: Սակայն հետաքրքրականը սրա նպատակն է, այսինքն՝ թե Սփյուռքում ինչով են զբաղվելու ԲՀԿ կառույցները:
Բնականաբար, նախ հստակեցման կարիք ունի այն, թե ինչ Սփյուռքի մասին է խոսքը, այսինքն՝ Սփյուռքի ինչ շրջանակների հետ պետք է աշխատի ԲՀԿ-ն: Ամենայն հավանականությամբ, խոսքը Հայաստանի արտագաղթած շրջանակների մասին է, քանի որ մյուս շրջանակներում գործում են հայկական ավանդական կուսակցությունները, և ԲՀԿ-ն այս շրջանակներում գործունեություն ծավալելու համար պետք է մրցակցության մեջ մտնի ՀՅԴ-ի, ՌԱԿ-ի կամ ՍԴՀԿ-ի հետ, որովհետև, այսպես ասած, ավանդական սփյուռքյան շրջանակները գերազանցապես ներգրավված են այս ավանդական կուսակցությունների շրջանակներում:
Մյուս կողմից, սակայն, ինչպես հայտնում են սփյուռքին քաջածանոթ գործիչները՝ ավանդական սփյուռքյան շրջանակներում, այնուամենայնիվ, մեծ անվստահություն կա այս ավանդական կուսակցությունների գործունեության հանդեպ, և չի բացառվում, որ ԲՀԿ-ն մտադիր է օգտվել այս հանգամանքից և սփյուռքահայությանն առաջարկել, այսպես ասած, այլընտրանքներ:
Այս ամենով հանդերձ՝ կասկած չկա, որ ԲՀԿ-ի սփյուռքյան հիմնական թիրախը լինելու են Հայաստանից հեռացածները, մասնավորաբար՝ նրանք, որոնք Հայաստանի քաղաքացիություն ունեն և հետևաբար ունեն քվեարկության իրավունք: Այստեղ գործ ունենք շատ նուրբ խնդրի հետ: Ըստ տարբեր հաշվարկների՝ Հայաստանից վերջին տարիներին հեռացել է մոտ մեկ միլիոն մարդ: Հայաստանյան ընտրություններում շատ է շրջանառվում 500 հազար թիվը, որն ըստ տարբեր գնահատականների՝ այսպես ասած, օդից ձայների քանակն է, երբ այդքան մարդ չկա, սակայն իշխանությունները այս մարդկանց անունից քվեարկություն են կազմակերպում և 500 հազար ձայներ ապահովում իրենց:
Ասել է թե՝ արտագաղթած, սակայն Հայաստանի քաղաքացիությունից և հայաստանյան գրանցումից դուրս չեկած քաղաքացիների հաշվին Հայաստանի իշխանական համակարգը ըստ էության վերարտադրվում է, ինչին անկասկած ոչ ոք ավելի քաջատեղյակ լինել չի կարող, քան այս վերարտադրությունների գործընթացի բազմակի մասնակից ԲՀԿ-ն:
Ներկայումս քանի որ ԲՀԿ-ի և ՀՀԿ-ի կորպորատիվ շահերը տարբեր են, և ԲՀԿ-ն ցանկանում է վերջապես ստանալ մեծամասնությունը, կուսակցությունը ձգտում է ՀՀԿ-ին այս մի քանի հարյուր հազար օդից ձայների ռեսուրսից զրկելու քայլեր ձեռնարկել: ԲՀԿ-ի մոտ կստացվի, թե ոչ՝ ցույց կտան ընտրությունների արդյունքները, սակայն ԲՀԿ-ն իհարկե այս անգամ էլ կփորձի՝ ինչպես 2007 կամ 2012 թվականներին:
Սփյուռքյան կառույցները այս անգամ նոր գործիք են այդ փորձում, և «Բարգավաճ Հայաստանի» սփյուռքյան կառույցների գլխավոր խնդիրը, ըստ ամենայնի, լինելու է այս ձայները հավաքելը, համակարգելը, այսպես ասած՝ ի մի բերելը, որից հետո հավանաբար կմշակվեն տարբերակներն ու հնարավորությունները, թե ինչպես է հնարավոր կանխել այդ քաղաքացիների անունից քվեարկությունները ՀՀԿ-ի օգտին:
ԲՀԿ-ն սկզբի համար երևի թե փորձում է կատարել առաջին քայլը՝ նա հավաքագրել է այդ՝ ըստ էության փոշիացված, հիմնականում Ռուսաստանով մեկ ցրված ռեսուրսը: Նոր դրանից հետո միայն, հստակ պատկերացնելով ռեսուրսի սահմանները, «Բարգավաճ Հայաստանը» երևի թե ձեռնամուխ կլինի այդ ռեսուրսը ՀՀԿ-ին մատուցվող անուղղակի, ակամա ծառայությունից հանելու մեխանիզմին:
Մի փոքր անիրատեսական է թվում, իհարկե, այն, որ ԲՀԿ-ն կարող է մի քանի հարյուր հազար մարդ ընտրությունների ժամանակ տեղափոխել Հայաստան, որպեսզի նրանց փոխարեն չքվեարկեն: Սակայն իսկապես ցնցող կլինի, եթե երթուղայիններով, տաքսիներով և ավտոբուսներով ընտրությունների տանելու երևույթը հարստանա նաև ինքնաթիռներով ընտրությունների տանելու իրողությամբ: Սա արդեն ոչ միայն մեկ քայլ առաջ կլինի՝ ինչպես սովորաբար, այլ մի քանի հազար կիլոմետր առաջ:
