Իտալիայի մայրաքաղաք Հռոմում գրականության ուսուցչուհին Twitter-ում բարձրաստիճան պաշտոնյաների անունից սուտ լուրեր է տարածել հայտնի մարդկանց մահվան մասին` հաղորդում է Agence France-Presse-ը:
Թոմասո Դե Բենեդետին ստեղծել է էջեր, որոնք, իբր, պատկանում են հայտնի մարդկանց, ինչպիսիք են, օրինակ, Իտալիայի վարչապետը, Աֆղանստանի նախագահը և այլն: Նրանց անունից Բենեդետին հրապարակել է հաղորդագրություններ նշանավոր մարդկանց մահվան մասին, օրինակ` Ջոան Ռոուլինգի, Ֆիդել Կաստրոյի, Միխայիլ Գորբաչովի, Հռոմի պապ Բենեդիկտոս 16-րդի: Սուտ տեղեկատվության հեղինակը հայտարարել է, որ Սիրիայի նախագահ Բաշար Ալ-Ասադի «մահվան» մասին լուրը հանգեցրել էր նավթի գների բարձրացման:
Դե Բենեդետիի խոսքերով` այս կերպ նա ցանկացել է ցույց տալ, որ Twitter-ը դարձել է «ամենաանհուսալի» լրատվական գործակալությունը, որտեղից որոշ լրագրողներ տեղեկատվություն են վերցնում` չստուգելով հաղորդագրության աղբյուրները:
Նա պնդում է, որ այս «խաղը» որևէ մեկին չի վնասել. զոհեր են դարձել այն անձինք, որոնք «կարճ ժամանակում կարող են հերքել սուտ հաղորդագրությունները»:
