Ռումինիայի նախագահ Տրայան Բեսեսկուն, որի նախագահության ժամկետն ավարտվում է դեկտեմբերին, մոլդովական հեռուստատեսությանը տված հարցազրույցում հայտարարել է, որ կընդունի Մոլդովայի քաղաքացիություն՝ 2 երկրների միավորման գաղափարն առաջ տանելու համար: Այս մասին հայտնում է korrespondent.net-ը:
«Ես հրաժեշտի այցով կմեկնեմ Քիշնև և կներկայացնեմ Մոլդովայի քաղաքացիության ստացման հայտ: Օրերս ես այդ հարցը քննարկեցի երկրի նախագահ Նիկոլայ Տիմոֆտիի հետ: Ես դա շատ եմ ցանկանում, դա շատ մեծ պատիվ է ինձ համար»,- հայտարարել է Բեսեսկուն:
Նա արտահայտվել է ապագայում 2 երկրների միավորման անհրաժեշտության օգտին:
«Ես երազում եմ Ռումինիայի և Մոլդովայի միացման մասին, քանի որ մենք 2 անկախ պետություններում ապրող մի ժողովուրդ ենք»,- նշել է Բեսեսկուն:
Նա խոստովանել է, որ միավորվելու համար դեռ անհրաժեշտ պայմաններ չեն ստեղծվել:
«Երբ 2 երկրներից ռումինացիների մեծ մասը ցանկանան ապրել 1 պետության մեջ, այդ ժամանակ դա, անշուշտ, տեղի կունենա»,- կարծում է Բեսեսկուն:
