Բլոգերները հրապարակել են ամերիկյան Journal News թերթի լրագրողների հասցեներն ու հեռախոսահամարները` այդպիսով վրեժխնդիր լինելով թերթում հրապարակված` Նյու Յորք նահանգի 2 շրջաններում զենք կրելու թույլտվություն ստացածների անձնական տվյալների նյութի համար:
СNN-ի հաղորդմամբ՝ թերթի լրագրողների մասին առաջին հաղորդողներից է եղել Քրիտոֆեր Ֆաունտին: Չնայած որ նրա անունն այդ ցանկում չի եղել, սակայն, հանդիսանալով ապագա զենք կրող, վիրավորվել է այդ հրապարակումից։
Նրա խոսքերով՝ ինքը ցանկացել է համարժեք պատասխան տալ լրագրողներին, ովքեր զենք ունեցողներին անհանգստություն պատճառելու համար օգտագործում են տպագիր մամուլը:
Մեկ այլ բլոգեր տեղեկություններ է հավաքագրել վերոհիշյալ թերթի հրատարակիչների, ղեկավարների և շարքային աշխատակիցների վերաբերյալ և հրապարակել է ինտերակտիվ քարտեզ` հենց թերթի կողմից կազմված:
Բլոգերների դժգոհությունն առաջացրած հրապարակումը թերթում հայտնվել է դեկտեմբերի 22-ին: Ինտերակտիվ քարտեզի վրա Ռոքլենդ և Ուեսթչեսթեր շրջանների մոտ հնարավոր էր տեսնել զենք կրելու համար թույլտվություն ունեցող անձանց անուններն ու հասցեները: Լրագրողները բացատրում էին, որ դա անհրաժեշտ է, որպեսզի բնակիչներն իմանան, թե իրենց հարևաններից ովքեր զենք ունեն:
Հրապարակումը համացանցում լայն քննարկման առիթ է դարձել, քանի որ թույլտվություն ունեցողները մտավախություն ունեին թե իրենց զենքերը կգողանան, իսկ իրենք կդառնան հասարակական քննարկման առարկա:
Ընթացիկ շաբաթվա 3 օրվա ընթացքում ամերիկացիները գնել են այնքան AR-15 զինատեսակ, որքան սովորաբար վաճառվում է 3,5 տարվա ընթացքում: «Սենդի Հուք» դպրոցի դեպքից հետո, երբ 20-ամյա Ադամ Լենզը մորը պատկանող Bushmaster AR-15 զինատեսակից կրակոցներով սպանեց 20 երեխայի և 7 մեծահասակի, զենքի վաճառքի ծավալները կտրուկ աճեցին:
