Իրանական Press TV հեռուստաալիքի փոխանցմամբ՝ Իրանի ԱԳՆ-ի պաշտոնական ներկայացուցիչ Ռամին Մեհմանպարաստը հայտարարել է, որ Իրանն աջակցում է Թուրքիային՝ «Քրդստանի աշխատավորական» կուսակցության (PKK) դեմ մղած պայքարում:
Մեհմանպարաստն այդ մասին հայտարարել է Տրապիզոնի նահանգապետի հետ հանդիպման ժամանակ՝ մեկնաբանելով Թուրքիայի ներքին գործերի նախարար Իդրիս Նաիմ Շահինի այն հայտարարությունը, թե Իրանն աջակցում է PKK-ին, որի վիրավոր մարտիկները բուժում են ստանում Իրանի հիվանդանոցներում.
«Թուրք պաշտոնատար անձինք տեղյակ են, որ մենք հանդես ենք գալիս այդ ահաբեկչական կազմակերպության դեմ: Մենք աջակցում ենք Թուրքիային՝ PKK-ի դեմ մղած պայքարում: Իրանն ու Թուրքիան՝ որպես տարածաշրջանի ուժեղ երկրներ, պետք է համագործակցեն տարածաշրջանային խնդիրների լուծման հարցում:
Մենք կարևորում ենք երկու երկրների միջև քաղաքական-տնտեսական կապերի ամրապնդման կարևորությունը: 2011 թվականին երկու երկրների միջև ապրանքաշրջանառության ծավալը կազմել է 16 միլիարդ դոլար, իսկ 2012 թվականին՝ մոտ 20 միլիարդ դոլար: Ակնկալվում է, որ մինչև 2015 թվականն այդ ցուցանիշը կհասցվի մինչև 30 միլիարդ դոլարի»:
