Նախագահ Սերժ Սարգսյանը հաստատել է Մարդու իրավունքների եվրոպական դատարանի դատավորի պաշտոնում Հայաստանի կողմից առաջադրվող թեկնածուների երեք հոգանոց ցուցակը:
Նախագահը արտգործնախարար Էդվարդ Նալբանդյանին կարգադրել է ցանկն ուղարկել Եվրախորհրդի խորհրդարանական վեհաժողով, որը երեք թեկնածուներից մեկին կընտրի փակ գաղտնի քվեարկությամբ:
Երևանում հոկտեմբերի 6-ից անցկացված մրցույթի արդյունքներով Սահմանադրական դատարանի նախագահ Գագիկ Հարությունյանի գլխավորած մրցութային հանձնաժողովը տասից ավելի թեկնածուներից ընտրեց նախկին օմբուդսմեն Արմեն Հարությունյանին, միջազգային իրավունքի մասնագետ Արայիկ Ղազարյանին և Գլխավոր դատախազության աշխատակից Նելիկ Հարությունյանին: Հանձնաժողովը վստահեցնում է, որ ընտրությունը եղել է արդար և թափանցիկ, մինչդեռ ընտրության ընթացքին հետևած «Իրավունքի Եվրոպա միավորում» կազմակերպությունը, որն ի սկզբանե ահազանգել էր մասնավորապես Արմեն Հարությունյանի օգտին հովանավորչության ռիսկերի մասին, այժմ զեկույց է պատրաստում իրենց արձանագրած խախտումների վերաբերյալ։
Կազմակերպության դիտորդ, Մարդու իրավունքների եվրոպական դատարան բազմաթիվ բողոքներ ներկայացրած իրավաբան Մուշեղ Շուշանյանը «Ազատության» հետ զրույցում կանխատեսելի էր համարում, որ նախագահ Սերժ Սարգսյանը պետք է հաստատեր հանձնաժողովի ընտրած այս երեք թեկնածուներին։
«Երևի զարմանալի է, որ ոմանք զարմանում են»,- նշել է նա։
Դիտորդական կազմակերպությունը ի սկզբանե ահազանգել էր, որ 14 թեկնածուներից 3-ի՝ Արմեն Հարությունյանի, դատավորներ Նորա Կարապետյանի և Արայիկ Մելքումյանի փաստաթղթերը գրանցվել են ժամկետի ավարտից շուրջ կես ժամ անց։ Գլխավոր դատախազից, Արդարադատության նախարարից, օմբուդսմենից և այլ բարձրաստիճան պաշտոնյաներից կազմված հանձնաժողովը, սակայն, հարցազրույցի մասնակիցների ցանկից հանեց միայն երկու դատավորներին, իսկ նախկին օմբուդսմենը մասնակցեց մրցույթին ու դարձավ հաղթողներից մեկը։
«Երկուսի մասով իրոք չկային ապացույցներ գործում, որ նրանք մինչև ժամը 18.00-ն փաթեթները հանձնել են հանձնաժողովի աշխատակազմին»,- «Ազատության» հետ զրույցում ասել է մրցութային հանձնաժողովի անդամ, փաստաբանների պալատի նախագահ Արա Զոհրաբյանը.- «Արմեն Հարությունյանի հարցով քննարկման ժամանակ հանձնաժողովի աշխատակազմը ներկայացրեց փաստաթղթեր, որոնցից կարելի էր հետևություն անել, որ Արմեն Հարությունյանը փաթեթը հանձնել է ամսի 23-ին, առավոտյան ժամը 10.00-ին։ Իմ տեսակետն է, որ այդ փաստաթղթերով կարելի է համարել պատշաճ»։
Ամբղջությամբ՝ «Ազատություն» ռադիոկայանի կայքէջում
