Թուրքական Doğan լրատվական գործակալության փոխանցմամբ՝ իրանական Mehr լրատվական գործակալությունը «ծանր» համեմատություն է կատարել Թուրքիայի հանդեպ: Մասնավորապես, Mehr-ը իսլամական կրոնը բաժանել է երկու մասի՝ «իրական իսլամ» և «ամերիկյան իսլամ»:
Գործակալությունը որպես «իրական իսլամի» վառ օրինակ է նշում իրանական հեղափոխության առաջնորդ այաթոլլահ Խոմեյնիին: Միևնույն ժամանակ, Mehr-ը, հրապարակելով օտարազգի առաջնորդների հետ Թուրքիայի նախագահ Աբդուլլահ Գյուլի, վարչապետ Ռեջեփ Էրդողանի և արտգործնախարար Ահմեդ Դավութօղլուի նկարները, «ամերիկյան իսլամի» օրինակ է մատնացույց արել:
Դա մասնավորապես վերաբերում է Գյուլի ու Էրդողանի լուսանկարներին՝ Իսրայելի նախագահ Շիմոն Պերեսի, Մեծ Բրիտանիայի թագուհի Էլիզաբեթի և հոլիվուդյան աստղ Անջելինա Ջոլիի հետ, ինչպես նաև Դավութօղլուի և ԱՄՆ պետքարտուղար Հիլարի Քլինթոնի հայտնի լուսանկարին (Դավութօղլուի թոռ ունենալու կապակցությամբ շնորհավորանքը)։ Բացի այդ, «ամերիկյան իսլամի» թվում են ընդգրկվել Սաուդյան Արաբիան, Կատարը և բազմաթիվ այլ արաբական երկրներ:
