Վենեսուելայի նախագահ Ուգո Չավեսի բուժման գործընթացում նկատվում է դրական շարժ: Այս մասին հաղորդում է ITAR-TASS-ը՝ վկայակոչելով Վենեսուելայի փոխնախագահ Նիկոլաս Մադուրոյին:
Մադուրոն նշել է, որ բոլիվարյան հեղափոխության առաջնորդին բուժում է «գիտական, ակադեմիական, պրակտիկ և կլինիկական տեսանկյունից լավագույն բժշկական անձնակազմը»:
Փոխնախագահը, որը Չավեսի բացակայության ժամանակ կատարում է երկրի նախագահի պարտականությունները, դատապարտել է ընդդիմության սկսած «շշուկների պատերազմը» և պահանջել հարգալից վերաբերմունք ցուցաբերել նախագահի հանդեպ:
«Պարոնա՛յք, հարգե՛ք հանրապետության նախագահին. նա մարդ է, ում աջակցում է ժողովուրդը, ով վայելում է մի ամբողջ մայրցամաքի աջակցությունը և հարգանքը»,-կոչ է արել Մադուրոն:
Հիշեցնենք, որ 2011թ. հունիսին Ուգո Չավեսը ենթարկվել էր չարորակ ուռուցքի հեռացման վիրահատության, սակայն մի քանի ամիս հետո նրա մոտ հայտնաբերվել էր նոր ուռուցք: Այս տարվա փետրվարին Հավանայի հիվանդանոցներից մեկում Չավեսը ենթարկվեց նոր վիրահատության: Սակայն 2012թ. դեկտեմբերին Վենեսուելայի նախագահը հայտարարեց, որ ստիպված է կրկին մեկնել Կուբա ևս մեկ վիրահատության համար:
